Qazaqstan elshisi Pákistan Prezıdentine senim gramotasyn tapsyrdy

ISLAMABAD. QazAqparat - Pákistan Prezıdenti Arıf Alvıge Qazaqstan Respýblıkasynyń Pákistandaǵy Elshisi Aqan Rahmetýllın senim gramotalaryn tapsyrdy, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.

Kezdesý barysynda Pákistan Prezıdenti elder arasynda qalyptasqan dostyq qarym-qatynasty, sondaı-aq óńirlik jáne jahandyq kún tártibindegi kóptegen máseleler boıynsha eki memlekettiń ustanymdarynyń uqsastyǵyna toqtaldy. Sonymen qatar, ol Qazaqstannyń Tuńǵysh Prezıdenti – Elbasy Nursultan Nazarbaevtyń ekijaqty qarym-qatynastardyń qalyptasýyna jáne Qazaqstan-Pákistan áriptestiginiń damýyna qosqan qomaqty úlesin erekshe atap ótti.

Óz kezeginde, A. Rahmetýllın jyly lebizin bildirip, Qazaqstanda bolyp jatqan ekonomıkalyq jáne saıası ózgerister týraly habardar etti.

Taraptar sondaı-aq saıası dıalogty, saýda-ekonomıkalyq yntymaqtastyqty jáne eki el arasyndaǵy mádenı-gýmanıtarlyq ózara is-qımyldy damytýdy qosa alǵanda, birqatar ózekti máselelerdi talqylady.

Kezdesý sońynda A. Alvı Elbasy N. Nazarbaevqa jáne Qazaqstan Prezıdenti K. Toqaevqa júrek tilegin jetkizdi, sondaı-aq Elshige Qazaqstan-Pákistan yntymaqtastyǵyn nyǵaıtý úshin tabysty jáne jemisti jumys tiledi.