Qazaqstan Elshisi Mońǵolııanyń premer-mınıstrimen kezdesý ótkizdi
Elshi Lývsannamsraı Oıýýn-Erdeneni qyzmetine taǵaıyndalýymen jáne dástúrli Shaǵan merekesimen (aı kúntizbesi boıynsha Jańa jyl) quttyqtady.
Kezdesý basynda otandyq dıplomat 2021 jyldyń 27 aqpanynda «Ulan-Batyr – Almaty» jáne 5 naýryzda «Ulan-Batyr – Nur-Sultan» baǵyttary boıynsha evakýatsııalyq arnaıy reısterdi uıymdastyrǵany úshin rızashylyǵyn bildirdi.
Óz kezeginde L.Oıýýn-Erdene Qazaqstan men Mońǵolııa arasyndaǵy yntymaqtastyq dıplomatııalyq qatynastar ornaǵannan beri turaqty damýda ekenin jáne osy yntymaqtastyq deńgeıin arttyrý úshin barlyq salalarda belsendi birlesken is-qımyl jasaý qajettiligin atap ótti.
Osy turǵyda, mońǵol tarapy Mońǵolııanyń burynǵy Premer-Mınıstri Ýhnaagıın Hýrelsýhtyń 2019 jyldyń qazan aıynda Nur-Sultanǵa jasaǵan resmı sapary kezinde qol jetkizilgen ýaǵdalastyqtardy júzege asyrý boıynsha jumysty jalǵastyrýǵa daıyn ekenin rastady. Osy oraıda, L.Oıýýn-Erdene joǵaryda atalǵan sapar barysynda qol jetkizilgen ýaǵdalastyqtardy tıimdi júzege asyrý maqsatynda arnaıy jumys tobyn qurý bastamasyn kóterdi.
Sonymen birge, Premer-mınıstri mádenı-gýmanıtarlyq yntymaqtastyqty keńeıtý múmkindigin qarastyrýdy usyndy jáne halyqty qol jetimdi baspanamen qamtamasyz etý boıynsha tájirıbe almasýǵa qyzyǵýshylyq bildirdi.
Sonymen qatar, taraptar eki el arasyndaǵy dostyq qatynastardy keńeıtý maqsatynda joǵary deńgeıdegi ózara saparlar men birlesken halyqaralyq is-sharalar uıymdastyrý týraly ýaǵdalastyqqa qol jetkizdi.
Budan basqa, suhbattasýshylar aýyl sharýashylyǵy, kólik, týrızm, saýda-ekonomıkalyq yntymaqtastyq, sondaı-aq halyqaralyq sahnadaǵy is-qımyldardy úılestirý salalarynda ekijaqty qarym-qatynastardyń kún tártibindegi bir qatar ózekti máselelerdi konstrýktıvti túrde talqylady.