Qazaqstan Elshisi Qyrǵyzstan Prezıdentine senim gramotalaryn tapsyrdy

NUR-SULTAN. QazAqparat - Qazaqstan Respýblıkasynyń Elshisi Rápil Joshybaev Qyrǵyz Respýblıkasynyń Prezıdenti Sadyr Japarovqa senim gramotalaryn tapsyrdy, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.

Rásim barysynda Qyrǵyzstan Prezıdenti Elshini qyzmetke taǵaıyndalýymen quttyqtaı otyryp, onyń atalǵan laýazymdaǵy aldaǵy jumysy eki memleket arasyndaǵy tatý kórshilikke negizdelgen ózara tıimdi qarym-qatynastardy odan ári damytýǵa yqpal etetinine senim bildirdi.

Rásimnen keıin bolǵan kezdesýde qazaqstandyq dıplomat Elbasy Nursultan Nazarbaev Qazaqstan men Qyrǵyzstan arasyndaǵy baýyrlastyq jáne odaqtastyq qarym-qatynastardy árdaıym qoldaıtynyn, ári bul baǵytty Prezıdent Qasym-Jomart Toqaev jalǵastyrǵanyn basa aıtty.

Taraptar ekijaqty jáne kópjaqty formattaǵy saıası dıalogtyń joǵary deńgeıin atap ótip, saýda-ekonomıkalyq, ınvestıtsııalyq jáne mádenı-gýmanıtarlyq yntymaqtastyqty arttyrý múmkinshilikteri boıynsha pikir almasty.

Kezdesý sońynda Prezıdent S. Japarov Elbasy N. Nazarbaev pen Prezıdent Q. Toqaevqa izgi lebizderin jetkizýdi surady jáne jańa Elshige qazaq-qyrǵyz qarym-qatynastaryn odan ári nyǵaıtý jolynda zor tabystar tiledi.