Qazaqstan Elshisi Cheh Respýblıkasynyń Prezıdentine senim gramotalaryn tabystady

NUR-SULTAN. QazAqparat - Qazaqstannyń Cheh Respýblıkasyndaǵy Elshisi Marat Tájın Cheh Respýblıkasynyń Prezıdenti Mılosh Zemanǵa senim gramotalaryn tabystady, dep habarlaıdy QR SІM baspasóz qyzmeti.

Kezdesý barysynda Mılosh Zeman ekijaqty saıası, ekonomıkalyq jáne gýmanıtarlyq yntymaqtastyqtyń damý bolashaqtaryn atap ótti.

Cheh Respýblıkasy Prezıdentiniń aıtýynsha Qazaqstan Chehııa úshin Ortalyq Azııa jáne TMD elderiniń ishindegi basymdyqqa ıe elderdiń biri bolyp tabylady.

Óz kezeginde Qazaqstan Elshisi Marat Tájın cheh tarapyna Qazaqstannyń halyqaralyq bastamalarynda, ekonomıkalyq, saıası jáne gýmanıtarlyq yntymaqtastyq salasyndaǵy máselelerde qoldaý kórsetkeni úshin alǵysyn bildirdi.