Qazaqstan Elshisi Ázerbaıjan Prezıdentine senim gramotalaryn tapsyrdy

BAKÝ. QazAqparat - Ázerbaıjan Respýblıkasynyń Prezıdenti Ilham Álıev Qazaqstan Respýblıkasynyń Ázerbaıjandaǵy jańadan taǵaıyndalǵan Tótenshe jáne Ókiletti Elshisi Álim Baıeldiń senim gramotalaryn qabyldady, dep habarlaıdy «QazAqparat» HAA menshikti tilshisi.

Qazaqstandyq dıplomat baýyrlas Ázerbaıjan Respýblıkasynda eliniń atynan qyzmet atqarý ózi úshin úlken mártebe ekenin atap ótti. Álim Baıel Qazaqstan men Ázerbaıjan Memleket basshylarynyń tapsyrmalary sheńberinde ekijaqty yntymaqtastyqty odan ári ilgeriletý boıynsha jumys isteıtinin aıtty.

Suhbat barysynda Ázerbaıjan Prezıdenti Ilham Álıev eki el arasyndaǵy yntymaqtastyq deńgeıiniń qarqynyna kóńiliniń tolyp otyrǵanyn aıta kele, óziniń Qazaqstanǵa jasaǵan sapary men Qazaqstan Prezıdentiniń Ázerbaıjanǵa jasaǵan saparynyń yqpaldastyqtyń keńeıýine úlken serpin bergenin atap ótti. Ázerbaıjan basshysy ózi men Prezıdent Qasym-Jomart Toqaev arasyndaǵy senimge negizdelgen qarym-qatynastyń qazaq-ázerbaıjan baýyrlastyq baılanystaryn odan ári nyǵaıtýdyń kepili ekendigin tilge tıek etti.

Ázerbaıjan Prezıdenti kólik-logıstıka salasynyń ekijaqty yntymaqtastyqtaǵy negizgi baǵyttardyń biri ekenine nazar aýdardy. Prezıdent Álıev búginde júzege asyrylyp jatqan birlesken ınfraqurylymdyq jobalar júk tasymaly kólemin keńeıtýge jaqsy múmkindik beretinin atap ótti. Ilham Álıev, sondaı-aq, qazaq munaıynyń Ázerbaıjan arqyly jýyrda bastalǵan tasymalynyń óte mańyzdy qadam bolǵanyn tilge tıek etti. Prezıdent Álıev Elshiniń qyzmetine tabys tiledi.

Óz kezeginde Álim Baıel Ázerbaıjan Prezıdentin jáne halqyn Táýelsizdik kúnimen quttyqtap, bıyl 100 jyldyq mereıtoıy keńinen atalyp jatqan Geıdar Álıevti qurmetpen eske aldy.

Dıplomat saýda-ekonomıkalyq yntymaqtastyqty damytý, sondaı-aq, elderimizben qatar, búkil óńir úshin úlken geoekonomıkalyq mańyzy bar jobalardy júzege asyrýdyń ekijaqty yntymaqtastyqtaǵy basymdyq ekendigimen kelisti. Atalǵan jobalardyń qatarynda Transkaspıı halyqaralyq kólik baǵytyn damytý, Kaspıı teńiziniń túbimen fıber-optıkalyq baılanys jelisin tartý, qazaq munaıynyń eksportyn ártaraptandyrý bar.

Kezdesýde, sondaı-aq, Qazaqstan men Ázerbaıjannyń halyqaralyq arenada, onyń ishinde Túrki memleketteri uıymy aıasynda jemisti yntymaqtastyq júrgizip otyrǵany atalyp ótti. Bıyl Qazaqstanda ótetin TMU-nyń 10-shy mereıtoılyq sammıtine daıyndyq barysy talqylandy.

Serikbol Qoshmambetov