Qazaqstan eksporty 9 mlrd dollarǵa deıin ósedi – Álıhan Smaıylov

NUR-SULTAN. QazAqparat – Bıyl aýyl sharýashylyq ónimderin óndirý úshin memleket qarjylaı kómekti eki esege ulǵaıtty. Bul týraly QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

Buǵan deıin Úkimet basshysy Reseıdegi geosaıası oqıǵalardan keıin tıisti daǵdarysqa qarsy sharalar keshenin qabyldaǵanyn aıtqan edi.

«Eń aldymen ishki naryqty otandyq ónimmen tolyq qamtamasyz etý sharasy bar. Ol úshin biz aýyl sharýashylyq ónimderin óndirý úshin qarjylaı memleket kómegin bıyl eki ese ulǵaıttyq. Ónerkásip óndirisine kelsek, biz arnaıy otandyq kásiporyndardy jáne ımportty almastyrý boıynsha ınvestıtsııalyq jobalardy iske asyrý jáne eksportty ulǵaıtýǵa arnaıy baǵdarlama qabyldadyq», - dedi Álıhan Smaıylov Ulttyq arnada «Jańa Qazaqstan» baǵdarlamasynda.

Premerdiń aıtýynsha, sol baǵdarlama sheńberinde 700-den astam ınvestıtsııalyq jobalar iske asyrylady.

«Bul jobalar negizinde bizdiń ımport kólemi 4 mlrd dollarǵa deıin azaıady jáne eksport kólemi 9 mlrd dollarǵa ósedi degen boljamdamyz. Sonymen birge kásipkerlikti damytý boıynsha birqatar naqty sharalar iske asyrylýda, halyqtyń tabysyn arttyrýǵa arnaıy baǵdarlama qabyldandy. Osyndaı máselelerdi bizdiń Úkimettiń kúndelikti jumysy dep aıtýǵa bolady», - dedi QR Premer-Mınıstri.

Aıta keteıik, Álıhan Smaıylov Reseıge qatysty geosaıası jaǵdaı men onyń elimizge áseri jóninde pikir bildirgen edi.