Qazaqstan ekonomıkasy jyl qorytyndysynda 2,5 paıyz ósim kórsete ala ma
Bul jaıynda búgin Úkimettiń selektorlyq rejimdegi otyrysynan keıingi brıfıngte QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat.
«Birinshi toqsannyń pozıtıvti tsıfrlary ósimniń arta túsetindigi jaıynda oılanýymyzǵa túrtki bolyp otyr. Degenmen, ótken jyldaǵy ІJÓ ósiminiń dınamıkasyna nazar aýdartqym keledi. Ótken jyly dál osy kezeńde quldyraý oryn aldy jáne soǵan sáıkes, tómen baza áseri boldy. Sondyqtan bul toqsan nátıjesi 2,5 paıyzdyq ósimniń jyl boıy 100 paıyz qamtamasyz etiletindigin bildiredi deý qıyn», - dedi ol BAQ ókilderiniń saýalyna oraı.
Sondyqtan da mınıstrdiń atap ótýinshe, aǵymdaǵy jyldyń qorytyndysynda elimizdiń ishki jalpy ósimi 1 paıyz bolady dep belgilengen.
«Menińshe, jalpy makroboljamdar men salalyq boljamdardy qaıta qarastyrý úshin dál qazirgi ýaqytta obektıvti alǵyshart joq. Degenmen, jartyjyldyqtyń qorytyndysyndaǵy statıstıkalar, derekterdi jáne sol ýaqytta qalyptasatyn ishki jáne syrtqy trendterdi eskere kele biz bul máselege qaıta oralatyn bolamyz. Al ázirshe 2,5 paıyzdy baǵdarǵa alyp, oǵan qol jetkizý úshin jumys isteýimiz qajet», - dedi Súleımenov.
Aıta keteıik, Úkimet otyrysynda Tımýr Súleımenov 2017 jylǵy І toqsanda eldegi ІJÓ 3 paıyzǵa óskenin málim etti. Ekonomıka ósiminiń qozǵaýshy kúshi ónerkásip, qurylys, kólik, aýyl sharýashylyǵy jáne saýda bolǵandyǵyn aıtty. Máselen, ónerkásip kólemi 5,8, aýyl sharýashylyǵy 2,9, qurylys jumystarynyń aýqymy 7,1, turǵyn úılerdi paıdalanýǵa berý 25,3 paıyzǵa ósken.
«Aýyl sharýashylyǵyndaǵy, óńdeý ónerkásibindegi, onyń ishinde tamaq ónimderi óndirisindegi, hımııa ónerkásibindegi ınvestıtsııalardyń ulǵaıýy baıqalǵanyn atap ótý qajet», - dedi mınıstr.