Qazaqstan ekologııalyq tıimdilik reıtınginde qaı elderden artta qaldy

<p>ASTANA. KAZINFORM — Qazaqstan keıingi jyldary 180 eldiń arasynda ekologııalyq tıimdilik reıtınginde 93-shi orynda turaqtap, Nambııa, Gabon jáne Zımbabve sııaqty elderden artta qaldy. Bizdiń elimiz jasyl jelekke bólengen elder reıtınginde 78 eldiń ishinde 72-shi orynda. Senator Sovetbek Medebaev óziniń depýtattyq saýalynda aýanyń, sýdyń jáne topyraqtyń shamadan tys lastaný problemalaryn jarııa etti.</p>

Depýtattyń aıtýynsha, Qazaqstanda Astana, Almaty, Aqtóbe, Qaraǵandy, Jezqazǵan jáne Temirtaýdaǵy aýa joǵary deńgeıde lastanǵany baıqaldy. Onyń bári adamdardyń ómiri men densaýlyǵyna teris áser etedi.

«Ulytaý oblysynyń Jezqazǵan jáne Sátpaev qalalarynda aımaqtaǵy óndiris oryndarynda zııandy gazdardy súzýge arnalǵan qondyrǵylardy jańartý jumystaryn der kezinde júrgizbese, óńirdiń ekologııalyq jaǵdaıy kúrt nasharlaýy múmkin. Qazirgi kezde Jezqazǵan óńirinde negizgi sý kózi — Keńgir sý qoımasy. Al sýdyń sapasy onda qanaǵattanarlyq emes, sý klasy boıynsha IV klass retinde anyqtalǵan. Sýdyń sapasyn jaqsartý boıynsha gıdrologııalyq jumystardy júrgizýmen qatar, Úıtas — Aıdos jerasty sý qubyrynyń qurylysyn da jedeldetý qajet», — dedi S. Medebaev Premer-Mınıstr Oljas Bektenovtiń atyna joldaǵan saýalynda.

Sonymen qatar senator óndiris oryndarynyń qaldyqtary ashyq jerlerde saqtalyp jatqanyn aıtty. Qatty turmystyq qaldyqtardyń kóp bóligi esh suryptaýsyz shyǵarylyp jatyr jáne ashyq polıgondar men qalalyq polıgondarda jınalǵan. 

Depýtat osyǵan baılanysty jaǵdaıdyń aýqymy men qazaqstandyqtardyń densaýlyǵyna eleýli qater tónýi múmkindigin eskere otyryp, ózekti máselelerdi sheshý jóninde birqatar sharalardy usyndy.

«Qaýipti qaldyqtar men qoqystardyń mólsherin azaıtý maqsatynda álemdik ekologııalyq standarttarǵa sáıkes ekojúıe engizý joldaryn qarastyrý qajet. Qaldyqtardy, onyń ishinde qurylys qaldyqtaryn jınaýǵa arnalmaǵan jerlerde zańsyz tasymaldaý jáne shyǵarý faktilerin anyqtaý maqsatynda tekserý jáne ózge de sharalar atqarý arqyly memlekettik baqylaýdy kúsheıtý qajet. Jergilikti jáne ortalyq atqarýshy organdar birlesip aýdandyq, qalalyq jáne aýyldyq eldi mekenderde turmystyq qatty qaldyqtardy basqarý, onyń ishinde turmystyq qatty qaldyqtardy bólek jınaý, tamaq jáne qurylys qaldyqtaryn qaıta óńdeý jóninde ınfraqurylym qurý máselesin qarastyrýy mańyzdy», — dep atap ótti Sovetbek Medebaev.