Qazaqstan EAEO-nyń senimdi logıstıkalyq haby bola alady – Prezıdent
Prezıdenttiń aıtýynsha, ári qaraı ıntegratsııalyq damýdyń taǵy bir mańyzdy baǵyty – jańa halyqaralyq kólik arterııalaryn qurý bolýy múmkin.
«Bizdiń ekonomıkalyq odaq saıyp kelgende, Eýropa men Azııa, jahandyq ońtústik pen soltústik arasyndaǵy baılanystyrýshy býynǵa aınalaryna senimdimin. Biz Reseı Federatsııasynyń QHR, Úndistan, Pákistan, Iran, Taıaý Shyǵys jáne Ońtústik-Shyǵys Azııa elderi baǵytynda dálizder qalyptastyrý nıetin quptaımyz. Transkaspıı baǵytymen ushtastyra otyryp, Soltústik – Ońtústik kólik dálizin damytý qajettigi týraly oı pisip-jetildi dep oılaımyn», - dedi Qasym-Jomart Toqaev Joǵary Eýrazııalyq ekonomıkalyq keńes otyrysynda.
Osyǵan baılanysty Q.Toqaev Qazaqstannyń barlyq múmkindikteri men resýrstaryn jumyldyryp, EAEO-nyń senimdi logıstıkalyq haby bolatynyn jetkizdi.
«Taqyryptyq bastama retinde Chelıabi – Bolashaq – Iran temirjol magıstralimen júrdek júk poıyzdaryn iske qosýdy usynamyz. Bul úshin Chelıabınskide júk jınaqtaıtyn ortalyq ashyp, «Soltústik – Ońtústik» kólik dáliziniń qazirgi ınfraqurylymyn paıdalanýǵa bolady. Biz ózimizdiń Beıneý – Mańǵystaý temir jol jelisindegi jáne Beıneý – Shalqar avtokólik jolyndaǵy talapqa saı kelmeıtin ýchaskelerdi qaıta salýǵa ázirmiz. Tıisti júk tasymaly aǵynyn qalyptastyrý úshin kúsh jumyldyrý mańyzdy. Sol sebepti Qazaqstan muny sózsiz iske asyrady. Baqty – Aıagóz temir jol qurylysyn ózara tıimdi yntymaqtastyǵymyzdyń naqty mysaly deýge bolady. Onyń iske qosylýy Qazaqstannyń da, Reseıdiń de Qytaı baǵytyna jóneltetin júk kólemin aıtarlyqtaı arttyrýǵa múmkindik beredi», - dedi Memleket basshysy.
Sondaı-aq, Qasym-Jomart Toqaev Iran men Túrikmenstannyń teńiz jáne qurǵaq porttarynda ınfraqurylym salýǵa birlesken ınvestıtsııalar qarastyrýǵa bolatynyn aıtty. Bul múshe memleketterdiń eksport geografııasyn edáýir keńeıtedi jáne logıstıkalyq múmkindikterin nyǵaıtady.
«Fızıkalyq ınfraqurylymdy damytýmen qatar taýarlar tranzıtiniń jalpy tsıfrlyq júıesin qurý sheshimderin ázirleý óte mańyzdy. Ol senimdi, biraq qoldanýǵa ońaı jáne ozyq tsıfrlyq tehnologııalarǵa negizdelýi kerek. Elektrondy plombalardy, jedel aqparat almasýdyń kepildik júıesin paıdalaný, «E-tereze» júıesin damytý máselelerin sheshý qajet. Bul sharalar taýar aǵynyn jyldamdatatyn jáne jetkizý tizbegin ońtaılandyratyn ortaq tsıfrlyq mýltımodaldy dáliz qurýǵa múmkindik beredi», - dedi Prezıdent.