Qazaqstan EAEO elderinen tys jerlerge benzın men dızel otynyn eksporttaýǵa tyıym salady

<p>ASTANA. KAZINFORM &ndash; Energetıka mınıstrligi UQK, ІІM jáne Qarjy mınıstrlikteriniń birlesken 2024 jylǵy 8 qazandaǵy &laquo;Qazaqstan Respýblıkasynyń aýmaǵynan munaı ónimderin áketýdiń keıbir máseleleri týraly&raquo; buıryǵyna tıisti tolyqtyrýlar jobasyn ázirledi.</p>

– 2025 jylǵy 1 qańtardan bastap alty aı merzimge Qazaqstan Respýblıkasynyń aýmaǵynan jeńil dıstıllıattardy, avıakerosın men dızel otynyn, gazoıldardy, tolýoldy, ksılol jáne munaı bıtýmyn EAEO kedendik aýmaǵynan tysqary jerlerge áketýge tyıym salynsyn, – delingen jobada.

Erekshelikter:

avtokólik óndirýshisi usynǵan gaz tsısternalarynda shyǵarý,

qospalardy tańdaý boıynsha ǵylymı-zertteý jáne tájirıbelik-konstrýktorlyq jumystardy júrgizý, úlgilerdi biliktilik jáne zerthanalyq synaý úshin avıatsııalyq otynnyń eksporty;

sondaı-aq, Qazaqstan Respýblıkasy Úkimetiniń sheshimi boıynsha gýmanıtarlyq kómek sheńberinde eksporttalatyn munaı ónimderiniń jekelegen túrleri.

Energetıka mınıstrligi elimizde AI-92 markaly benzın men dızel otynyn tutyný artqanyn, bul qordyń azaıýyna ákelgenin habarlady.

Osylaısha, quqyq qorǵaý organdarynyń málimetinshe, «jabyq taýar» degen jeleýmen janar-jaǵarmaıdyń «sur» eksporty men aǵynynyń aı saıynǵy kólemi 10-nan 45 myń tonnaǵa deıin jetedi, bul baǵanyń aıyrmashylyǵyna baılanysty — Qazaqstanda janar-jaǵarmaı baǵasy kórshi eldermen salystyrǵanda 17–166%-ǵa tómen.

Nátıjesinde 2024 jyldyń 10 aıynda benzın qory 453 myń tonnadan 295 myń tonnaǵa, al dızeldik otyn 554 myń tonnadan 279 myń tonnaǵa deıin azaıǵan.

Osyǵan baılanysty munaı ónimderiniń eksportyna, onyń ishinde EAEO aýmaǵynan tys eksportqa baqylaýdy kúsheıtý qajet, degen sheshim qabyldanýda.

EAEO aýmaǵynan tys munaı ónimderin eksporttaýǵa tyıym salý mynalarǵa múmkindik beredi:

jartylaı fabrıkattardy óńdeý arqyly qazaqstandyq munaı óńdeý zaýyttarynyń jumys istemeıtin qýattaryn júkteý jáne tıisinshe eldegi janar-jaǵarmaı tapshylyǵyn azaıtý;

bajsyz jetkizý sharttaryn oryndaý jáne ımporttalatyn munaı ónimderiniń keri eksportyn joıý.

Jobany ázirleýshiler ony júzege asyrý memlekettik bıýdjetten qosymsha qarajat bólýdi qajet etpeıtinin atap ótedi. Bul sharalar, olardyń pikirinshe, teris áleýmettik, ekonomıkalyq nemese quqyqtyq saldarǵa ákelmeıdi, kerisinshe ulttyq qaýipsizdikti nyǵaıtýǵa jáne ishki naryqtyń qajettilikterin qanaǵattandyrýǵa kómektesedi.

Qujat jobasy 2024 jyldyń 10 jeltoqsanyna deıin Ashyq NQA portalynda talqylaý úshin ornalastyrylǵan.

Aıta keteıik, depýtat Ermurat Bapı qazaq munaıyn eksporttaýǵa jaýapty biregeı operator qurýdy usynǵan bolatyn.