Qazaqstan EAEO elderine qandaı taýar túrlerin eksporttaıdy

NUR-SULTAN. QazAqparat – Eýrazııa ekonomıkalyq odaǵyna múshe elder arasynda taýar aınalymynyń turaqty ósimi baıqalady. Atap aıtqanda, 2017 jyly kórsetkish 407 bolsa, 2021 jyldyń sońyna qaraı atalǵan kórsetkish 446-ǵa jetken. Bul týraly QR Saýda jáne ıntegratsııa mınıstrligi tehnıkalyq retteý jáne metrologııa komıtetiniń tóraǵasy Arman Ábenov málim etti, dep habarlaıdy QazAqparat tilshisi.

«Búginde biz birlesken kúsh-jigerimizben ónimniń tolyqqandy ortaq naryǵyn qurdyq. Tehnıkalyq reglamenttegi mindetti normalar men standarttardy erikti túrde qoldana otyryp ónimniń qaýipsizdigin qamtamasyz etemiz. Sol sekildi taýarlardyń EAEO naryǵynda erkin qozǵalysynyń negizgi sharttaryn tolyq oryndap otyrmyz. Taldaý nátıjesi kórsetkendeı, Qazaqstanda Eýrazııa ekonomıkalyq odaq elderine eksporttalatyn taýarlardyń turaqty ósýi baıqalady. Nazarlaryńyzǵa sońǵy 5 jylǵy (2017-2021 jj) statıstıkany usynamyn. Eger 2017 jyly bizdiń elden 809 taýar túri eksportqa shyǵarylsa, ótken jyly atalǵan kórsetkish 837 taýar túrine artty», - dedi Arman Ábenov Bishkekte ótip jatqan Eýrazııa ekonomıkalyq forýmynda.

Onyń aıtýynsha, elimizden EAEO-ǵa negizinen tamaq, et-sút, mashına jasaý ónimderi men taǵy sol sııaqty taýarlar eksporttalady.

«Sondaı-aq odaqqa múshe elder arasynda taýar aınalymynyń turaqty ósýi baıqalady. ıAǵnı 2017 jyly kórsetkish 407 bolsa, 2021 jyldyń sońyna qaraı 446-ǵa jetken. Odaq qurylǵaly álemdik ekonomıkanyń jahandyq syn-qaterine jaýap beretin ıntegratsııalyq birlestiktiń tıimdi jumysy kórinis tapty. Qazirgi ýaqytta ózara jetkiziletin ónimniń 85%-ǵa jýyǵy biryńǵaı retteýge jatady. Ol degenimiz - odaq naryǵynda taýar aınalymy úshin biryńǵaı talaptar men qaǵıdalar qoldanylady degen sóz», - deıdi ol.