Qazaqstan EAEO aıasynda «veto» quqyǵyn joıýǵa jol bermeıdi
Otyrysta Eýrazııalyq ekonomıkalyq ıntegratsııany damytýdyń 2025 jylǵa deıingi strategııalyq baǵyttary jobasyn talqylaý mańyzdy máseleleriniń biri boldy. Buǵan deıin, Joǵary Keńestiń 2020 jylǵy 19 mamyrdaǵy otyrysy barysynda QR Prezıdenti Qasym-Jomart Toqaevtyń eskertýlerimen Strategııa jobasy pysyqtaýǵa jiberilgen edi.
«Qazirgi ýaqytta komıssııanyń kadr saıasaty jáne EEK-tiń saýda sharalary jónindegi sheshimderine «veto» quqyǵyn qoldaný bóliginde Strategııa jobasyna qazaqstandyq usynystardy talqylaý jalǵasýda. Kelissózderde Komıssııada jumys isteý úshin úmitkerlerdi tek izdenýshilerdiń kásibı daǵdylary negizinde irikteý máselesiniń prıntsıptiligi atap ótildi. Sondaı-aq, «veto» quqyǵyn qoldaný memlekettiń sózsiz egemendi quqyǵy bolyp tabylady. Bul oǵan estýge jáne ekonomıkalyq múddelerge sáıkes kelmeıtin sheshimder qabyldaýǵa jol bermeýge múmkindik týdyrady», - dedi Saýda jáne ıntegratsııa vıtse-mınıstri.
Sonymen qatar atalǵan jıynda EAEO elderi arasynda COVID-19 jaǵdaıynda jolaýshylar qatynasyn qalpyna keltirý máselesi de talqylanǵan.
«Qazirgi ýaqytta álemde COVID-19 koronavırýs indeti óte alańdatarlyq jaǵdaı bolyp otyr. Sondyqtan biz úshin bul másele óte sezimtal sanalady. Óıtkeni azamattarymyzdyń qaýipsizdigi bárinen joǵary. Osy turǵyda biz EAEO-ǵa múshe memleketterdiń sanıtar dárigerlerine EEK-pen birlesip, qajetsiz táýekelge jol bermeı, EAEO-ǵa múshe memleketter arasyndaǵy jolaýshylar kóligi qatynasyn jańartý jóninde tásilder ázirleýdi usyndyq», - dedi Janel Kýshýkova.
Atalǵan máseleni qaraý barysynda Úkimet basshylary EADB-nyń bastamasyn qarastyrdy.
«Eýrazııalyq damý banki shyǵatyn azamattardyń COVID-19 testileriniń nátıjelerin keıinnen EAEO elderimen ózara tanı otyryp shoǵyrlandyratyn tsıfrlyq platforma qurýdy usyndy. EADB usynyp otyrǵan tásili azamattardyń EAEO ishindegi qozǵalysyn jeńildetýge múmkindik beredi. Jalpy, biz bul bastamany qoldadyq. Endi onyń praktıkalyq iske asyrylýyn qamtamasyz etý qajet», - dedi ol.
Sonymen qatar Premer-Mınıstrler EAEO-da taýarlardyń transshekaralyq elektrondyq saýdasyn retteý máselesin qarady.
«Aǵymdaǵy shyndyqtar álemdik IT-naryq óte jyldam qarqynmen damyp kele jatqanyn kórsetedi. Sonymen qatar, ol bıýdjetke túsetin túsimderdi azaıtý, taýarlardyń tómen sapasy túrinde táýekelderdi kóteredi. Jańa shynaıylyq jaǵdaıynda biz transshekaralyq elektrondyq saýdany retteýdiń negizgi baǵyttaryn kelistirdik» - dedi vıtse-mınıstr.
QR Saýda jáne ıntegratsııa mınıstrligi baspasóz qyzmetiniń málimetinshe, Úkimet basshylary sondaı-aq eksportty damytýdyń birlesken sharalary men EAEO aıasynda agroónerkásiptik keshendi damytýdyń birlesken boljamdaryn kelisti. Bul ýaǵdalastyqtar otandyq bızneske úshinshi elderdiń naryqtaryna eksport spektri men kólemin keńeıtýge, aýyl sharýashylyǵy naryǵyn odan ári damytýdyń kókjıegin belgileýge múmkindik beredi.
Esterińizge sala keteıik, 2020 jyldyń 9 qazanynda Eýrazııalyq úkimetaralyq keńestiń kezekti otyrysy ótti.