Qazaqstan DSU-ǵa múshe elder mınıstrleriniń konferentsııasyna tóraǵalyq etedi

NUR-SULTAN. QazAqparat - Qazaqstan Dúnıejúzilik saýda uıymyna múshe elder mınıstrleriniń konferentsııasyna tóraǵalyq etedi. Bul týraly Qazaqstan Prezıdenti Qasym-Jomart Toqaev Dúnıejúzilik saýda uıymynyń Bas dırektory Ngozı Okondjo-Ivealamen vıdeo konferentsııa formatynda kezdesý barysynda aıtyldy, dep habarlaıdy QazAqpart.

Kezdesýde Qazaqstannyń tóraǵalyǵymen ótetin DSU-ǵa múshe elder mınıstrleriniń 12-shi konferentsııasyna daıyndyq máselelerine erekshe nazar aýdaryldy.

«Biz úshin bıylǵy qarashanyń sońy jeltoqsannyń basynda ótetin DSU-ǵa múshe elder mınıstrleriniń 12-shi konferentsııasyna tóraǵalyq etý úlken mártebe. Qazaqstan Úkimeti ortaq is-sharamyzdyń barlyq mazmundyq jáne uıymdastyrýshylyq máselelerine qatysty pysyqtaý jumystary boıynsha DSU Hatshylyǵymen tyǵyz yqpaldastyq ornatady», – dedi Memleket basshysy.

Prezıdenttiń aıtýynsha, Qazaqstan kópjaqty saýda júıesin belsendi jaqtaıtyn bolǵandyqtan, Konferentsııanyń naqty nátıje ákelýine múddeli. Sondaı-aq kún tártibindegi barlyq sheshilmegen máselelerdi talqylaýǵa óz tarapynan konstrýktıvti túrde úles qosýǵa daıyn ekenin jetkizdi.