«Qazaqstan dıplomattary birlestigi» quryldy (FOTO)

ASTANA. QazAqparat - Búgin QR syrtqy ister mınıstrliginde «Qazaqstan dıplomattary birlestigi» aımaqtyq qoǵamdyq birlestiginiń alǵashqy konferentsııasy ótti, dep habarlady QR SІM baspasóz qyzmeti.

Otyrys barysynda birlestiktiń atqarýshy jáne baqylaý organdary saılandy, sondaı-aq Almaty qalasynda birlestiktiń fılıalyn qurý týraly sheshim qabyldandy.

Konferentsııaǵa qatysqan QR syrtqy ister mınıstri Erlan Ydyrysov dıplomattardy jańa birliestik qurylýymen quttyqtady. Ol ujymnyń ákimshilikpen turaqty baılanysyn qamtamasyz etýde, barlyq qyzmetkerlerdiń pikirlerin eskerýde jáne Qazaqstannyń syrtqy saıasatyn júzege asyrýda jáne memleketimizdiń halyqaralyq bastamalaryn ilgeri jyljytýǵa árbir dıplomattyń belsene qatysýynda qoǵamdyq ınstıtýt qyzmetiniń mańyzyn atap ótti.

«Birlestik dıalog, maqsattardyń ortaqtyǵy, syndardy ıdeıalar men kreatıv úshin alań bolýy tıis, ujymnyń rýhy men ahýalyn nyǵaıta túsýge jáne ózara qoldaýǵa kómektesýi qajet. Bul 5 ınstıtýtsıonaldyq reformalardy júzege asyrý jónindegi Ult jospary aýqymyndaǵy jańa qubylys», dedi E.Ydyrysov.

«Qazaqstan dıplomattary birlestiginiń» negizgi maqsattary QR syrtqy saıasatyn júzege asyrýǵa járdemdesý, Birlestiktiń quqyqtary men múddelerin qorǵaý jáne qazaqstandyq dıplomattar urpaqtary arasyndaǵy sabaqtastyqty nyǵaıtý bolmaq.