Qazaqstan depozıtterge kepildik berý qory bank salymshylaryna ótemaqy berýdi jedeldetpek

ALMATY. QazAqparat - Qazaqstan depozıtterge kepildik berý qory (QDKQ) salymshylarǵa ótemaqyny bank lıtsenzııasynan aıyrylǵan kúnnen bastap aýdarýǵa usynys bildirdi, dep habarlaıdy QazAqparat tilshisi.

2018 jyly qazaqstandyq bank sektorynda úsh birdeı iri bank - «Astana banki», «Qazaq Banki», «Eksımbank» taratylǵan bolatyn.

«Tólem jasaý mezgilinde bastalyp, barlyq protsedýralar durys bolsa da, depozıtterge kepildik berý júıesi óziniń tıimsizdigin kórsetti. Qazaqstan zańnamasyna sáıkes jabylǵan bankterdiń salymshylaryna ótemaqy bankti kúshtep taratý týraly sot sheshimi shyqqan soń 14 jumys kúni ishinde jasala bastaıdy. Sot protsesiniń uzaqqa sozylǵanyna baılanysty úsh banktiń 286 myń salymshysy ótemaqyny 9-10 aı boıy kútken bolatyn», - dedi Qazaqstan depozıtterge kepildik berý qorynan.

Qor ókilderiniń aıtýynsha, keıbir salymshylar barlyq salymdaryn da osy taratylǵan úsh bankke salǵan.