Qazaqstan delegatsııasy Sırııa máselesi boıynsha BUU Qaýipsizdik Keńesiniń otyrysyna qatysty
Kezdesý barysynda BUU Bas hatshysynyń gýmanıtarlyq máseleler boıynsha orynbasary Mark Loýkok brıfıng ótkizdi.
M. Loýkok Afrın, Idlıb, Hama qalalaryndaǵy qarýly qaqtyǵystar men áýe shabýyldaryna qatysty alańdaýshylyq bildirdi.
«Medıtsınalyq mekemeler syndy azamattyq ınfraqurylymǵa shabýyldar áli de jalǵasyp keledi. Aqpan aıynda medıtsınalyq nysandarǵa shabýyl jasaýdyń 28 oqıǵasy tirkeldi, jyl basynan beri jalpy sany 70-ten astam shabýyl jasaldy. Damaskte sońǵy aptada Shyǵys Gýtadan atylǵan snarıadtardan eń kemi 78 adam qaza tapty, 230 adam jaraqat aldy», - dedi Mark Loýkok.
Otyrys barysynda birqatar memleket ókilderi «Sırııadaǵy astanalyq kepil elder - Reseı, Iran jáne Túrkııanyń 4 sáýir kúni Ystanbulda ótetin kezdesýge deıin 16 naýryzda jarııalanǵan mindettemelerdi oryndaýda tabysqa jetetinderine» úmit bildirdi.
Qazaqstandyq delegatsııa basshysy Qaırat Omarov óz sózinde Qazaqstannyń Sırııadaǵy egemendikti, táýelsizdikti, birlikti jáne aýmaq tutastyǵyn saqtaýǵa, sondaı-aq Sırııadaǵy gýmanıtarlyq máselelerdi sheshýge baǵyttalǵan BUU Qaýipsizdik Keńesiniń barlyq qararlarynyń oryndalýyna nıetti ekenin eske saldy.
Qazaqstan Qaýipsizdik Keńesiniń ózge de músheleri sııaqty, gýmanıtarlyq qoljetimdilikti qamtamasyz etýdi, onyń ishinde Sırııadaǵy kómekke muqtaj mıllıondaǵan adamdarǵa transshekaralyq kómek kórsetýdi qoldaıdy.
Qazaqstandyq delegatsııa mamyr aıynyń ortasyna josparlanǵan kezekti Astana protsesi aıasynda Astana bastamasynda qol jetkizilgen kelisimderdiń saqtalýyn qamtamasyz etýge nazar aýdaratynyn atap ótti.
Qazaqstannyń BUU janyndaǵy Turaqty ókili Sırııa úkimetinen bosqyndar lagerine gýmanıtarlyq kómek kórsetýge járdem berýdi, qorshalǵan aýmaqtarǵa gýmanıtarlyq dáliz ashýdy surady.