Qazaqstan delegatsııasy Islam uıymy Atqarýshy keńesiniń sessııasyna qatysty
2017 jylǵy 3 qazanda Marokkonyń astanasy Rabat qalasynda Bilim, ǵylym jáne mádenıet isteri jónindegi Islam uıymy (ISESKO) Atqarýshy keńesiniń 38-shi sessııasyna Qazaqstannyń Mysyrdaǵy Elshisi Arman Isaǵalıev bastaǵan Qazaqstan delegatsııasy qatysty.
Іs-sharaǵa Marokko Úkimetiniń músheleri, ISESKO-ǵa múshe memleketterdiń ókilderi, halyqaralyq uıymdardyń delegatsııalary jáne atalǵan ıslam uıymnyń basshylyǵy men sarapshylary qatysty. Kezdesýde uıymnyń 2016 jylǵy atqarǵan jumysy týraly esep jáne aldaǵy josparlary, atap aıtqanda 2019-2027 strategııasy talqylandy. Uıymnyń bas dırektory Abdýlazız at-Týıedjrı QR Prezıdenti Nursultan Nazarbaevtyń bastamasymen jýyrda Astana qalasynda ótken ǵylym jáne tehnologııalar jónindegi Islam Sammıtiniń nátıjelerine joǵary baǵa berdi.
Óziniń baıandamasynda Qazaqstan delegatsııasynyń basshysy ISESKO-nyń jumys josparyna Astanadaǵy «EKSPO-2017» kórmesiniń burynǵy aýmaǵyndaǵy ǵylymı tehnologııalyq jobalarǵa qatysýyn, Qazaqstan bastaǵan «Jahandyq energııa jáne ekologııalyq strategııasy» jáne BUU Bas Assambleıasynyń 66-shy sessııasynda bekitilgen «Jasyl kópir» áriptestik baǵdarlamasyna atsalysýyn qosý týraly usynys jasady. Sonymen qatar, forýmda Astana qalasynda úsh jyl saıyn ótetin Álemdik jáne dástúrli dinder lıderleriniń Sezine ISESKO-nyń qatysýy jáne azyq-túlik qaýipsizdigi jónindegi Islam uıymy sheńberinde yntymaqtastyq ornatý máseleleri kóterildi.
Іs-shara aıasynda Elshi ISESKO-nyń bas dırektor men kezdesti. Kezdesý barysynda Qazaqstan men Uıym arasyndaǵy yntymaqtastyq máseleleri, Qazaqstanda iske asyrylyp jatqan «Rýhanı jańǵyrý» baǵdarlamasy boıynsha áriptestik quryp, birlesken jobalardy iske asyrý joldary qarastyryldy.