Qazaqstan delegatsııasy BUU-nyń Azaptaýǵa qarsy komıtetiniń sessııasyna qatysady

ASTANA. QazAqparat – QR Prezıdentiniń janyndaǵy Adam quqyqtary jónindegi komıssııanyń tóraǵasy Igor Rogov bastaǵan delegatsııa BUU-nyń Azaptaýǵa qarsy komıtetiniń 76-shy sessııasyna qatysady. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«2023 jylǵy 2-3 mamyrda Qazaqstan Respýblıkasy Prezıdentiniń janyndaǵy Adam quqyqtary jónindegi komıssııanyń tóraǵasy Igor Rogov bastaǵan qazaqstandyq delegatsııa Jenevada ótetin Birikken Ulttar Uıymynyń Azaptaýǵa qarsy komıtetiniń 76-shy sessııasyna qatysady. Atalǵan sessııa barysynda Azaptaýlarǵa jáne basqa da qatygez, adamgershilikke jatpaıtyn nemese ar-namysty qorlaıtyn is-áreketter men jazalaý túrlerine qarsy konventsııanyń oryndalýy týraly Qazaqstannyń Tórtinshi merzimdi baıandamasy qorǵalady», - dedi A. Smadııarov elordada ótken baspasóz máslıhatynda.

Onyń aıtýynsha, atalǵan konventsııa aıasyndaǵy mindettemelerge sáıkes, barlyq qatysýshy memleketter óz merzimdi baıandamalaryn usynady, sodan keıin Birikken Ulttar Uıymynyń Komıtetinde qorǵaıdy.

«Qorǵaýdan keıin Komıtet qorytyndy eskertýlerin jarııalaıdy, olardyń negizinde Qazaqstan Respýblıkasynyń memlekettik organdary kelesi esepti daıyndaıdy», - dedi resmı ókil.

Budan buryn habarlanǵandaı, 2023 jylǵy 5 mamyrda Qazaqstan Premer-Mınıstriniń orynbasary – Syrtqy ister mınıstri Murat Nurtileý Shanhaı yntymaqtastyq uıymyna (ShYU) múshe memleketterdiń Syrtqy ister mınıstrleri keńesiniń otyrysyna qatysady.