Qazaqstan DEF reıtınginde nege tómendedi - Energetıka mınıstrliginiń jaýaby

ASTANA. QazAqparat - QR Energetıka mınıstrligi Dúnıejúzilik ekonomıkalyq forýmnyń Jahandyq básekege qabilettilik reıtıngi nátıjelerimen kelispeıtinderin málimdedi, dep habarlaıdy QazAqparat tilshisi.

Aıta keteıik, 2017 jyly atalǵan reıtıngtiń elektrmen qamtý sapasy ındıkatorynda Qazaqstan 4,6 upaı jınap, Rýanda Respýblıkasymen (4,4 upaı) qatar 82 oryn alǵan edi.

Mınıstrlik ókiliniń aıtýynsha, bul ındıkator saýalnama jolymen anyqtalady. ıAǵnı, respondentke «Elińizdegi elektrmen qamtý sapasyn qalaı baǵalar edińiz?» degen suraq qoıylady jáne 1-7 upaı aralyǵynda baǵalaý múmkindigi beriledi.

«Shynymyzdy aıtsaq, bul saýalnamamen kelispedik jáne DEF ındıkatorlary boıynsha óz saýalnamamyzdy júrgizdik. DEF barsha Qazaqstan boıynsha 86 respondentten ǵana jaýap alǵan. Al biz 2 700 adam arasynda saýalnama júrgizdik. Nátıjesinde 7 upaıdan 5,6 upaı jınaldy. Bul shamamen Polsha deńgeıimen shamalas. Astanaǵa kelsek, qaladaǵy elektrmen qamtý sapasy óte joǵary», - dep habarlady QR Energetıka mınıstrligi Atomdyq jáne energetıkalyq baqylaý men qadaǵalaý komıteti tóraǵasynyń orynbasary Abaı Shańǵytbaev astanalyq kásipkerlermen kezdesýde.   

QR Ulttyq ekonomıka mınıstrligi keltirgen derekterge sáıkes, Qazaqstan Jahandyq básekege qabilettilik reıtıngine 12 jyldan berip qatysyp keledi. Ótken jyly Qazaqstan 138 memleket arasynan 57 orynǵa turaqtady. 2018 jyly 45 orynǵa deıin kóterilý josparlanyp otyr.