Qazaqstan daıyn munaı-gaz ónimderi eksportyn 9 esege arttyrady

NUR-SULTAN. QazAqparat – 2025 jylǵa qaraı 5 munaı-gaz hımııa zaýyty paıdalanýǵa beriledi. Bul týraly Ortalyq kommýnıkatsııalar qyzmetindegi baspas máslıhatynda QR Ulttyq ekonomıka mınıstri Áset Erǵalıev aıtty, dep habarlaıdy QazAqparat tilshisi.

Onyń atap ótýinshe, «Qazaqstandyqtardyń ál-aýqatyn arttyrýǵa baǵyttalǵan ornyqty ekonomıkalyq ósý» ulttyq jobasynyń «Munaı-gaz hımııalyq keshenin damytý» baǵyty aıasynda shıkizattyq emes eksportty ulǵaıtý jáne ishki suranysty qanaǵattandyrý úshin iri joǵary tehnologııalyq munaı-gaz hımııalyq óndirisi iske qosylady.

«2025 jylǵa qaraı 5 munaı-gaz hımııa zaýyty paıdalanýǵa beriledi. Nátıjesinde munaı-gaz hımııalyq ónimin óndirý kólemi 140 myńnan 2 mln tonnaǵa deıin artyp, munaı-gaz hımııa ónimi ımportynyń úlesi 87 paıyzdan 72 paıyzǵa azaıady. Bul rette daıyn munaı-gaz ónimderiniń eksporty 9 esege, 1,4 mlrd AQSh dollaryna artady», - dedi mınıstr.