Qazaqstan dári jasaý úshin BUU-dan esirtki men psıhotroptyq zattarǵa kvota bólýdi surady

ASTANA. QazAqparat – Medıtsınalyq maqsatta paıdalanylatyn esirtki men psıhotroptyq zattardyń keler jylǵa arnalǵan mólsheri bekitilmek, dep habarlaıdy QazAqparat tilshisi.

«Syrtqy ister mınıstrligi osy qaýlynyń qosymshasyna sáıkes, Qazaqstan Respýblıkasyna arnalǵan halyqaralyq kvotalardy BUU-nyń Esirtkini baqylaý jónindegi halyqaralyq komıtetiniń bekitýi úshin esirtkige jáne psıhotroptyq zattarǵa 2024 jylǵa arnalǵan qajettilik normalaryn Birikken Ulttar Uıymynyń Esirtkini baqylaý jónindegi halyqaralyq komıtetiniń shtab-páterine jibersin. Ishki ister mınıstrligi halyqaralyq kvotalardy bekitkennen keıin esirtkige, psıhotroptyq zattar men prekýrsorlarǵa lıtsenzııalary bar zańdy tulǵalar olardyń aınalymyn júzege asyratyn qajettilik esebin belgilengen tártippen Úkimetke engizsin», - delingen Ashyq NQA portalynda jarııalanǵan Úkimet qaýlysynyń jobasynda.

Qujatta jazylǵandaı, keler jyly elimizdegi 2 uıym medıtsınalyq maqsatta sıntetıkalyq esirtki daıyndaýǵa myna mólsherde kvota surap otyr:

- «Hımfarm» AQ:

Morfın - 2429,637 keli;

Trımeperıdın - 9021,653 keli;

Fentanıl - 165,885 keli.

- «VIVA Farm» JShS:

Kodeın - 0,0003767 keli;

Morfın - 1504,1 keli.

«Qabyldanyp jatqan sharalar esirtki men psıhotroptyq zattar aınalymy salasyndaǵy memlekettik baqylaý nysandarynyń biri bolyp sanalady, bul bekitilgen normatıvter sheginde zańdy maqsattar úshin paıdalanylatyn esirtki jáne psıhotroptyq zattardy bólýde memlekettik josparlaýdy júzege asyrýǵa múmkindik beredi. Osy joba Qazaqstannyń óndirýshi kásiporyndary men zańdy tulǵalarynyń 2024 jylǵy esirtki men psıhotroptyq zattar qajettiligin tolyǵymen qamtamasyz etýge baǵyttalǵan. Qazaqstannyń esirtki men psıhotroptyq zattarǵa qajettilik normalaryn Úkimet jyl saıyn bekitedi. Osy normatıvtik-quqyqtyq aktilerdiń negizinde elimizde esirtkiniń, psıhotroptyq zattar men prekýrsorlardyń memlekettik kvotalaryn bólý júrgiziledi», - dep túsindirme berilgen Úkimet qaýlysyna.

BUU kvotany maquldaǵan jaǵdaıda, el ishinde medıtsınalyq jáne ǵylymı maqsattarǵa qoldaný úshin myna kólemde tómendegi preparattar bólinedi:

- Atsetıldıgıdrokodeın - 0,06 gramm;

- Geroın - 0,153 gramm;

- Dezomorfın - 0,02 gramm;

- Kodeın - 60,8277 gramm;

- Kokaın - 0,023 gramm;

- Metadon - 987,913 gramm;

- Morfın - 548,24 gramm;

- Oksıkodon - 803,44 gramm;

- Omnopon - 441,19 gramm;

- Tebaın - 7,024 gramm;

- Trımeperıdın - 742,296 gramm;

- Fentanıl - 347,8296 gramm;

- 3-monoatsetıl morfın - 0,101 gramm;

- 6-monoatsetıl morfın - 0,086 gramm.