Qazaqstan dárihanalaryndaǵy birqatar preparatqa baqylaý kúsheıtilmek
«Qazaqstan Respýblıkasy Úkimetiniń 2023 jylǵy 20 naýryzdaǵy № 240 qaýlysymen «tramadol», «ketamın», «etızolam» zattary Qazaqstan Respýblıkasynda baqylaýǵa jatatyn esirtki quraldarynyń, psıhotroptyq zattar men prekýrsorlardyń tizbesine engizilgen. Budan ári joǵaryda atalǵan dárilik zattardy retseptsiz satqany úshin qylmystyq jaýaptylyq kózdelgen. Densaýlyq saqtaý jáne Іshki ister mınıstrlikteri múddeli memlekettik organdarmen birlesip, «Qazaqstan Respýblıkasynyń keıbir zańnamalyq aktilerine esirtki quraldarynyń, psıhotroptyq zattar men olardyń prekýrsorlarynyń zańsyz aınalymyna qarsy is-qımyl máseleleri boıynsha ózgerister men tolyqtyrýlar engizý týraly» Zańynyń jobasy aıasynda kúshti áser etetin zattardyń (tramadol, ketamın, etızolam) zańsyz aınalymy úshin qylmystyq jaýaptylyqty engizdi», - delingen Densaýlyq saqtaý mınıstriligi Medıtsınalyq jáne farmatsevtıkalyq baqylaý komıtetiniń Kazinform agenttigine bergen jaýabynda.
Komıtettiń aýmaqtyq departamentteri óz quzyreti aıasynda «tramadol», «tropıkamıd», «mıdaks» jáne basqa da dárilik zattardyń, onyń ishinde monıtorıngtik toptardyń quramynda retseptsiz satylýynyń aldyn alý, anyqtaý ári jolyn kesý boıynsha turaqty negizde baqylaý jasap otyr.
Vedomstvo málimetinde, 2020 jyly 45 derek anyqtalyp, 4 mln teńgeden astam somaǵa aıyppul salyndy. 2021 jyly 8 mln teńgeden astam somaǵa aıyppul salynyp, 80 fakt tirkeldi. Al 2022 jyly 10 mln teńge somasyna aıyppul salynyp, 98 derek anyqtaldy.
Atap aıtqanda, Qazaqstan Respýblıkasynda nashaqorlyqqa jáne esirtki bıznesine qarsy kúrestiń 2023 – 2025 jyldarǵa arnalǵan keshendi jospary bekitildi. Josparda qarastyrylǵan is-sharalar nashaqorlyqpen kúres júıesin jetildirýge, taldaý negizinde jańa psıhoaktıvti zattardy anyqtaýǵa baǵyttalǵan.
«Sonymen qatar, dárilik zattardy tańbalaý men qadaǵalaýdy engizý aıasynda Komıtet budan ári Qazaqstan Respýblıkasy Úkimetiniń 2020 jylǵy 10 qyrkúıektegi № 568 qaýlysymen bekitiletin tańbalaýǵa jáne qadaǵalaýǵa jatatyn dárilik zattar tizbesine «tramadol», «tropıkamıd» jáne «zopıklon» dárilik zattaryn engizýdi josparlap otyrǵanyn atap ótý qajet», - dep atalyp ótken vedomstvo málimetinde.