Qazaqstan Damý Bankiniń kredıttik portfeli byltyr 20 paıyzǵa artty - B. Jámishev

ASTANA. QazAqparat - 2015 jyly Qazaqstan Damý Bankiniń kredıttik portfeli 20 paıyzǵa artty. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte «Qazaqstan Damý Banki» AQ Basqarma Tóraǵasy Bolat Jámishev málim etti.

Tóraǵanyń aıtýynsha, byltyrǵy jyl qorytyndysy boıynsha barlyq josparly kórsetkishterge qol jetkizildi. «Atap aıtqanda, kredıttik portfel mólsheri josparlanǵan 943 mıllıard teńgeden asyp, 1,5 trıllıon teńgeni qurady. Teńge baǵamynyń áserin eseptemegende, ósimniń naqty kórsetkishi 2014 jylmen salystyrǵanda 20 paıyzdy qurady», - dedi B.Jámishev.

Onyń aıtýynsha, banktiń aktıvindegi kredıttik portfeli 62 paıyzdan 68 paıyzǵa artqan. «Bundaı nátıjege negizinen byltyrǵy jyly 42 jobany jalpy somasy 280 mlrd teńgege qarjylandyrý týraly sheshimniń arqasynda qol jetkizildi. 2014 jyly 226 mlrd teńgeni quraıtyn 14 joba ǵana qarjylandyrylǵan bolatyn. Budan bólek, byltyr bank 50 mıllıon dollardy quraıtyn kepildemelerdi de shyǵardy», - dedi Tóraǵa.