Qazaqstan COVID-19-ǵa qarsy sheteldik vaktsınalardan bas tartýy múmkin

NUR-SULTAN. QazAqparat – Aldaǵy ýaqytta elimiz koronavırýsqa qarsy sheteldik vaktsınalardan bas tartyp, tek qana otandyq QazVac qaldyrylýy múmkin. Bul boljamdy QR Densaýlyq saqtaý vıtse-mınıstri, bas memlekettik sanıtarlyq dáriger Aıjan Esmaǵambetova keltirip otyr, dep habarlaıdy QazAqparat tilshisi.

«Qazir elimizdiń aı saıyn 500 myń dozaǵa deıin QazVac vaktsınasyn shyǵarý múmkindigi bar. Bul ishki suranysty tolyq óteı alady. Aldaǵy tamyz-qyrkúıekke qaraı qosymsha 500 myń doza QazVac qajet. Tapsyrys berildi. Sonymen qatar, Pfizer vaktsınasyn satyp alý boıynsha kelisim júrip jatyr», - dedi Aıjan Esmaǵambetova ortalyq kommýnıkatsııalar qyzmeti alańynda ótken baspasóz máslıhatynda.

Vıtse-mınıstr Pfizer vaktsınasynyń tek jasóspirimderge, júkti jáne sábı emizetin áıelderge ǵana egiletinin eskertti.

«Basqa sanattaǵy azamattarǵa koronavırýsqa qarsy Sinopharm jáne QazVac vaktsınasy usynylady. Al, aldaǵy ýaqytta tek QazVac vaktsınasy bolýy múmkin. Sebebi, óndiris kólemi ishki suranysty tolyq qamtı alady», - deıdi ol.

Sondaı-aq, Aıjan Esmaǵambetova sheteldik vaktsınalardy aqyly saldyrýǵa qatysty pikir bildirdi.

«Qazaqstandyqtardyń koronavırýsqa qarsy qalaǵan sheteldik vaktsınany saldyrtý múmkindiginiń bolýyn biz de qalaımyz. Biraq, ol bizdiń ǵana qolymyzda emes. Jeke óz basym Moderna jáne Pfizer vaktsınasyn óndirýshilermen kelissóz júrgizdim. Ókinishke qaraı, barlyq jetkizýshiler vaktsınanyń aqyly bolýyna qarsy, ıaǵnı kez kelgen sheteldik vaktsına tek memlekettik kelisimniń negizinde jetkizilýi tıis», - dedi elimizdiń bas memlekettik sanıtarlyq dárigeri brıfıng barysynda.

Aıta keteıik, Qazaqstan 300 myń doza Pfizer vaktsınasyn satyp almaq.

Sondaı-aq, elimizde koronavırýsqa qarsy jańa preparat emdeý hattamasyna engizilýi múmkin.