Qazaqstan chempıony atanǵan «Qaırat» memleketten qansha qarajat aldy

<p>ALMATY. KAZINFORM &ndash; Almatynyń &laquo;Qaırat&raquo; fýtbol klýby kúni keshe fýtboldan Qazaqstan birinshiliginiń jeńimpazy atandy. Osy oraıda Kazinform tilshisi Almaty qalasynyń Sport basqarmasyna saýal joldap, el chempıony atanǵan klýbqa bıyl qansha qarajat berilgenin anyqtady.</p>

Qalalyq sport basqarmasy óz jaýabynda «Qaırat» fýtbol klýby tolyqtaı jeke menshik ıeliginde ekenin jáne basqarmaǵa qarasty emes ekenin habarlady. Sondaı-aq basqarma jeke klýbtardy kásibı sport túrleri boıynsha tikeleı qarjylandyrmaıtynyn málimdedi.

Vedomstvo jaýabyna sáıkes, kásibı klýbtardyń qyzmetterin satyp alý básekelestik ortada, memlekettik satyp alý portalyndaǵy ashyq konkýrs arqyly júzege asyrylady jáne oǵan barlyq áleýetti qyzmet kórsetýshi qatysa alady.

Bıyl ashyq konkýrsqa qatysý arqyly «Qaırat» fýtbol klýby 750 mıllıon teńge qarajat alǵan.

– Basqarma memlekettik satyp alý portalynda ashyq konkýrs arqyly «Ártúrli jas sanattaryndaǵy jasóspirim komandalardy uıymdastyrý jáne olardyń Qazaqstan Respýblıkasy birinshiligine qatysýyn qamtamasyz etý qyzmetteri» atty qyzmetterge 750 mln teńge kóleminde ashyq konkýrs jarııalady. Konkýrs nátıjesinde jeńimpaz bolyp «Qaırat» FK JShS anyqtaldy, - delingen basqarma jaýabynda.

Aıta ketken jón, 1994 jyly qurylǵan Almaty fýtbol federatsııasynyń quramynda búgingi kúni Qazaqstan Premer-lıgasynda óner kórsetetin «Qaırat» fýtbol klýby, І lıgadaǵy «Qaırat-Jastar», «Han Tengrı», 2 lıgadaǵy «AQAS», «Jas Qyran», «QazAST» klýbtary bar.

Sonymen qatar Almaty sport basqarmasynyń málimetine sáıkes, megapolıste shaǵyn fýtboldan túrli lıgalar jumys isteıdi jáne barlyǵy 90 myńnan astam almatylyq fýtbol klýbtarynda, komandalarda, sektsııalarda oınap, túrli týrnırler men jarystarǵa qatysady. Shaǵyn fýtbol lıgalary: 6H6 «Bedeldi fýtbol lıgasy» – 84 komanda, «Fýtbol áýesqoılary lıgasy» – 78 komanda, Túngi lıga formaty 8H8 – 16 komanda, áıelder lıgasy – 8 komanda, fýtzal lıgasy – 10 komanda.

– Qala boıynsha fýtboldy, onyń ishinde balalar fýtbolyn damytý aıasynda 5-18 jas aralalyǵyndaǵy balalarǵa arnalǵan «Balalar fýtbol lıgasy» atty joba 2022 jyldan beri úzdiksiz iske asyrylyp keledi. Osy jyly atalǵan jobaǵa 5-18 jas aralyǵyndaǵy 330 komanda nemese 5 200 bala tirkeldi. Almatydaǵy buqaralyq sportty damytý boıynsha memlekettik sporttyq jáne shyǵarmashylyq tapsyrystardy oryndaıtyn «Damu Bala» platformasy jumys isteıdi. Atalaǵan platformaǵa bıyl 7,2 mlrd teńge bólindi. Onyń ishinde 79 fýtbol sektsııasynda 170 jattyqtyrýshy 3660 balany fýtbolǵa baýlyp keledi, - dep habarlady basqarmadan.

Eske salaıyq, buǵan deıin «Qaırat» – fýtboldan 2024 jylǵy Qazaqstan chempıony atanǵanyn jazǵanbyz.