Qazaqstan Chelıabi oblysynda ótetin ShYU oqý-jattyǵýlaryna qatysady

MÁSKEÝ. QazAqparat - Sársenbi kúni Chelıabi oblysynyń Chebarkýl qalasynyń mańynda ornalasqan polıgonda Shanhaı yntymaqtastyq uıymyna (ShYU) múshe elder Qarýly kúshteriniń «Beıbit mıssııa - 2018» birlesken áskerı antıterrorıstik komandalyq-shtabtyq oqý-jattyǵýlary bastalady.

 Bul jóninde TASS agenttigine Ortalyq áskerı okrýgi áskerleriniń qolbasshysy, general-leıtenant Aleksandr Lapın málim etti.

«Oqý-jattyǵýlarǵa Qazaqstan, Tájikstan, Reseı, Úndistan, Pákistan elderiniń, sondaı-aq, Qytaı Halyq-azattyq armııasynyń  áskerı basqarma organdary, qurlyqtaǵy ásker bólimsheleri men qarýly kúshter avıatsııasy qatysady. Ózbekstan ókilderi baqylaýshy retinde keledi.  «Beıbit mıssııa - 2018» oqý-jattyǵýlaryna ShYU-na múshe-memleketterdiń 3 myńdaı áskerı qyzmetkeri men 500-den astam tehnıka jumyldyryldy», - dedi Lapın.

Chelıabi oblysyna temirjol kóligimen jáne ushaqtarmen ózderiniń tehnıkasyn jetkizgen 1,7 myńnan astam sheteldik áskerıler keldi.

Shanhaı yntymaqtatyq uymy qurylǵaly beri oǵan múshe memleketter birneshe ret «Beıbit mıssııa» ataýymen birlesken antıterrorıstik oqý-jattyǵýlar ótkizip úlgerdi. Olardyń alǵashqysy 2003 jyldyń tamyz aıynda Ózbekstannan basqa ShYU-ǵa múshe barlyq elderdiń qatysýymen Qazaqstan men Qytaı aýmaǵynda ótken.

Mundaı jattyǵýlar eki jylda bir ret uıymdastyrylady. Sońǵy ret 2016 jyly Qyrǵyzstan aýmaǵynda ótkizilgen.