Qazaqstan-Chehııa bıznes-forýmynda 230 mln eýroǵa kelisimder jasaldy

ASTANA. QazAqparat - Astanadaǵy Qazaqstan-Chehııa bıznes-forýmynyń qorytyndysy boıynsha Skoda Transportation kompanııasymen, EGAP eksporttyq saqtandyrý agenttigimen, Chehııanyń eksporttyq bankimen, Transco kompanııasymen jalpy quny 230 mln eýrony quraıtyn memorandýmǵa jáne basqa da qujattarǵa qol qoıyldy. QazAqparat bul týraly primeminister.kz saıtyna silteme jasap habarlaıdy.

Іs-sharaǵa eki el Úkimetteriniń basshylary Álıhan Smaıylov pen Petr Fıala, memlekettik sektordyń, ulttyq kompanııalar men isker toptardyń ókilderi qatysty. Bıznes-forým aıasynda plenarlyq otyrys ótti jáne B2B formatynda ekijaqty kezdesýler boldy.

Álıhan Smaıylov óz sózinde qazirgi ýaqytta respýblıka aýmaǵynda 200-ge jýyq birlesken kásiporyn jumys isteıtinin atap ótti.

«Cheh bıznesiniń Qazaqstanda birlesken jobalardy iske qosýǵa qyzyǵýshylyq tanytýy – bizdiń elimizdegi qolaıly ınvestıtsııalyq ahýaldyń shynaıy kórinisi. Bizde serpindi ınvestıtsııalyq jobalardy júzege asyrý úshin barlyq qajetti alǵysharttar bar», — dedi Álıhan Smaıylov.

Ol Qazaqstan ınvestıtsııa tartý boıynsha Ortalyq Azııada kóshbasshy bolyp qala beretinin eske saldy. Osylaısha, táýelsizdik jyldarynda respýblıka 410 mlrd dollardan astam tikeleı sheteldik ınvestıtsııa tartýǵa qol jetkizdi.

«Bizdiń strategııalyq mindetimiz – 2029 jylǵa deıin taǵy 150 mlrd dollar ınvestıtsııa tartý. Elimizdegi ınvestorlar úshin salyqtyq jeńildikter, kedendik tólemderden bosatý jáne t. b. túrli memlekettik qoldaý sharalary qarastyrylǵan. Ekonomıkanyń basym sektorlary úshin bólek arnaıy ekonomıkalyq jáne ónerkásiptik aımaqtar bar. Olardyń qatysýshylary barlyq qajetti ınfraqurylym men jeńildikter paketin alady», — dedi Premer-Mınıstr.

Úkimet basshysy ınvestıtsııa tartýdyń mańyzdy alańyna aınalǵan, tıisti qarjy quraldary men qyzmetteriniń tolyq jıyntyǵyna ıe «Astana» halyqaralyq qarjy ortalyǵynyń qyzmetin erekshe atap ótti. Ortalyqtyń tabysty jumysynyń dáleli – onda qazirdiń ózinde álemniń 73 elinen 1800-den astam kompanııa tirkelgen.

Sóz sońynda Álıhan Smaıylov Astanada ótip jatqan bıznes-forým Qazaqstan men Chehııanyń ózara saýda-ekonomıkalyq qarym-qatynastaryn tereńdetýge tyń serpin beretinin atap ótti.

«Bizdiń forým aıasynda 230 mln eýro somasyndaǵy birqatar qujattarǵa qol qoıylýda. Sonyń negizinde túrli birlesken jobalardy júzege asyrý josparlanyp otyr. Biz chehııalyq áriptestermen ınvestıtsııalyq yntymaqtastyǵymyzdy odan ári tereńdetýge daıynbyz jáne nıettemiz», — dep túıindedi sózin Premer-Mınıstr.