Qazaqstan byltyr nelikten munaıdy azyraq eksporttady

NUR-SULTAN. QazAqparat – 2020 jyly Qazaqstan nelikten aldyńǵy jyldan qaraǵanda azyraq eksporttady? Bul suraqqa «Kaspıı Qubyr jelisi Konsortsıýmy-K» AQ bas dırektory Nıkolaı Gorban jaýap berdi, dep habarlaıdy QazAqparat tilshisi.

«Ózderińiz biletindeı, 2020 jyldyń mamyr aıynan bastap OPEK+ uıymyna kiretin munaı eksporttaýshy memleketter men uıymdar tamyz aıyna deıin munaı óndirisin táýligine 9,7 mln barrelge deıin tómendetý týraly mámilege kelgen bolatyn. Osy sheshimdi maquldaǵan Qazaqstan Úkimeti ótken jyldyń mamyry men shildesi jáne tamyzy men jeltoqsany aralyǵynda óndiristi barlaý jáne júrgizý isine ýaqytsha shekteý qoıdy», - dedi Nıkolaı Gorban Ortalyq kommýnıkatsııalar qyzmetindegi baspasóz máslıhatynda.

Osy shekteý byltyr qazaqstandyq júk jetkizýshileriniń munaıdy jóneltý kestesine áser etken. Kontsortsıýmnyń Qara teńiz jaǵasyndaǵy termınalyna munaıdy tıep, jóneltý kólemi azaıǵan.

Eske sala ketsek buǵan deıin Nıkolaı Gorban Qazaqstannan qansha kólemde munaı eksporttalatynyn aıtyp bergen bolatyn.

«2020 jyldyń sońynda konsortsıýmnyń teńiz termınalynda 59 mıllıon tonnadan astam munaı qabyldanyp, jóneltildi. Onyń 51,7 mıllıon tonnasy qazaqstandyq júk jóneltýshilerdiń úlesinde. Ókinishke qaraı, bul jospardan shamamen 7 mıllıonǵa tonnaǵa az. ıAǵnı biz jospardyń 89,8%-yn ǵana oryndadyq, 572 tanker jónelttik», - dedi spıker.