Qazaqstan byltyr 67 elge $5,6 mlrd aýylsharýashylyq ónimin eksporttady

ASTANA. QazAqparat – Astana halyqaralyq forýmy sheńberinde paneldik sessııaǵa qatysqan Aýyl sharýashylyǵy mınıstri Erbol Qarashókeev byltyr Qazaqstan shet elderge qandaı taýarlar eksporttaǵanyn aıtty, dep habarlaıdy QazAqparat tilshisi.

«Byltyr aýyl sharýashylyǵy taýarlarynyń jekelegen túrlerine eksporttyq shekteý qoıyldy. Degenmen ol bizdiń damýymyzǵa keri áser etken joq. Máselen, 2022 jyly agroónerkásip kesheni ónimderin eksporttaýdan túsken paıda 5,6 mlrd dollar boldy. Bul pandemııaǵa deıingi kezeńmen salystyrǵanda 46% kóp. Atap aıtqanda, sheteldik naryqtarǵa bıdaıdy shyǵarý – 34,7%, maıly daqyldardy jóneltý 66% artty», - dep málim etti Erbol Qarashókeev.

Vedomstvo basshysynyń sózine saı, bul rette eksportqa daıyn ónimder kóp shyǵarylǵan. Búginde Qazaqstan álemniń 67 eliniń naryǵyna 531 aýyl sharýashylyǵy ónimin shyǵarady.

Erbol Qarashókeevtiń aıtýynsha, byltyr aýyl sharýashylyǵy salasynyń negizgi kapıtalyna 2 mlrd dollar ınvestıtsııa tartylǵan. Sondaı-aq azyq-túlik taýarlarynyń óndirisi 4% artyp, 6,5 mlrd dollarǵa jetti.