Qazaqstan BUU reıtınginde elektrondy úkimetti damytý boıynsha 28-orynda tur
«Dostar! Sizdermen jaqsy jańalyqty jetkizgim kelip otyr! Qazaqstan BUU (UN Global E-Government Development Index) reıtınginde «elektrondyq úkimetti» damytý boıynsha 28-oryndy ıelendi. Osylaısha, 29-shy qatardan bir orynǵa joǵary kóterildik.
Reıtıngti shyǵarý barysynda BUU sarapshylary elektrondyq qyzmetter men adamı kapıtaldyń damýyn, sondaı-aq telekommýnıkatsııalyq ınfraqurylymdy baǵalaıtynyn eske sala keteıin. Bul reıtıng sońǵy ret 2020 jyly jarııalanǵan bolatyn. Biz koronavırýs pandemııasyna jáne basqa da qıyndyqtarǵa qaramastan eki jyl ishinde óz kórsetkishterimizdi josparly túrde jaqsarta aldyq.
Tsıfrlyq úkimetti damytý Memleket basshysynyń erekshe baqylaýynda, Qasym-jomart Kemeluly tsıfrlyq transformatsııa eldiń básekege qabilettiligin aıqyndaıtynyn atap ótti. Biz osymen toqtap qalmaı, otandyq aqparattyq-kommýnıkatsııalyq tehnologııalardyń sapasyn arttyrý baǵytynda tıisti jumysty jalǵastyratyn bolamyz. Bolashaqta kóshbasshylardyń qatarynan kórinip, BUU reıtınginde 20-shy oryndy ıelenýge tyrysamyz!»,-delingen habarlamada.