Qazaqstan BUU-nyń jaýapty ári bedeldi múshesi bolyp qala beredi - Muhtar Tileýberdi
«Birikken Ulttar Uıymy – dúnıejúzindegi barsha adamzattyń muń-muqtajyn qorǵaıtyn balamasy joq, biregeı ári ámbebap uıym. Uıymnyń 75 jyldyǵy – búkil álemdik qaýymdastyq úshin mańyzdy oqıǵa. Ekinshi dúnıejúzilik soǵystyń qorytyndysy boıynsha halyqaralyq qaýymdastyqtyń músheleri halyqaralyq beıbitshilik pen qaýipsizdikti saqtaý, ekonomıkalyq jáne áleýmettik progreske járdemdesý úshin kelisimge keldi jáne Uıym Jarǵysyn qabyldady. Sonyń arqasynda belsendi ári aýqymdy halyqaralyq yntymaqtastyq dáýiri ornyqty. Qazaqstan Respýblıkasy – Birikken Ulttar Uıymynyń úsh negizgi salasyna: qaýipsizdik, ornyqty damý jáne adam quqyqtaryna súbeli úles qosyp kele jatqan memleket», - dedi mınıstr quttyqtaý sózinde.
Sonymen qatar ol egemendi el retinde Qazaqstan bul qundylyqtardy alǵashqy qadamdarynan bastap qoldaǵanyn basa aıtty.
«Adamzat muńyn túsinip, óz memleketiniń múddesin ǵalamdyq múddemen úılestirgen, Qazaqstan halyqaralyq qoǵamdastyqtyń jaýapty jáne bedeldi múshesi bolyp qala beredi. Táýelsizdigimizge qol jetkizgen kezden bastap, Tuńǵysh Prezıdent – Elbasy Nursultan Nazarbaevtyń kóptegen beıbit bastamalary Birikken Ulttar Uıymynyń joǵary minbesinen jarııalandy. Olardyń arasynda Azııadaǵy ózara yqpaldastyq jáne senim sharalary jónindegi keńes, Ortalyq Azııa ekonomıkalaryna arnalǵan arnaıy baǵdarlama jáne 29 tamyz – Halyqaralyq ıadrolyq synaqtarǵa qarsy is-qımyl kúni sııaqty bastamalardy atap ótkim keledi. Birikken Ulttar Uıymynyń burynǵy joǵary laýazymdy tulǵasy retinde Prezıdent Qasym-Jomart Toqaev halyqaralyq uıymdarmen yntymaqtastyqty nyǵaıtý boıynsha bastalǵan isti jalǵastyrdy. Birikken Ulttar Uıymy alańynda birneshe ret sóılegen sózderinde ol birqatar bastamalaryn jarııa etti», - dedi Muhtar Tileýberdi.
Eske salaıyq, búgin Memleket basshysy Birikken Ulttar Uıymynyń 75 jyldyǵyna oraı BUU Bas hatshysy Antonıý Gýterrıshke quttyqtaý jedelhatyn joldady.