«Qazaqstan BUU Qaýipsizdik keńesiniń turaqty emes músheligine óz kandıdatýrasyn usynbaq» - BAQ-qa sholý
***
Elimizdiń Syrtqy ister mınıstrliginde Qazaqstannyń 2017-2018 jyldary bolatyn BUU Qaýipsizdik Keńesiniń turaqty emes músheligine kandıdatýrasyn ilgeriletýge arnalǵan qabyldaý ótken edi. Bul is-sharaǵa elimizdiń Syrtqy ister mınıstri Erlan Ydyrysov bastaǵan osy vedomstvonyń basshylary, Prezıdent Ákimshiliginiń jaýapty qyzmetkerleri, Parlamenttiń qos palatasynyń depýtattary, elimizdiń ózge de mınıstrlikteri men vedomstvolarynyń, sheteldik dıplomatııalyq korpýstyń, BAQ ókilderi qatysqan. Osmy rette «Egemen Qazaqstan» gazeti Qazaqstan syrtqy saıasat vedomstvosynyń basshysy E.Ydyrysovty atalǵan máselege baılanysty áńgimege tartqan. «Ózderińiz biletindeı, Qaýipsizdik Keńesi - beıbitshilik pen qaýipsizdik úshin óz moınyna úlken jaýapkershilik alǵan basty jahandyq organ. Osyǵan baılanysty Keńestiń quramy ol halyqaralyq qoǵamdastyqtyń pikirin barynsha tolyqtaı kórsete alatyn deńgeıde qalyptastyrylǵany óte mańyzdy. Qazaqstannyń oıǵa alǵany oryndalǵan jaǵdaıda alǵash ret Keńes múshesi atanyp, Azııa tobynda ádiletti geografııalyq bólinistiń tepe-teńdigi qamtamasyz etiletin bolady», - deıdi mınıstr. Suhbat «Qazaqstan BUU Qaýipsizdik keńesiniń turaqty emes músheligine óz kandıdatýrasyn usynbaq» degen taqyryppen berilgen.
«Egemen Qazaqstan» gazetiniń jazýynsha, Májilis Tóraǵasy Nurlan Nyǵmatýlınniń jetekshiligimen ótken palatanyń keshegi jalpy otyrysynda Balqash jylý elektr stansasyn salý, TMD-ǵa múshe elderdiń adamdardy memleketaralyq izdeýge qatysty zań jobalary talqyǵa salyndy. Osy jaıt arqaý bolǵan maqala «Balqash JES-i elektr qýaty tapshylyǵyn joıýy tıis» degen taqyryppen berilgen. «Palata Qazaqstan men Koreıa úkimetteri arasyndaǵy Balqash jylý elektr stansasyn damytý, qarjylandyrý, jobalaý, salý, paıdalaný jáne oǵan tehnıkalyq qyzmet kórsetý salasyndaǵy kelisimge ózgerister engizý týraly Hattamany ratıfıkatsııalaý týraly zań jobasyn maquldady. Atalǵan túzetýler Balqash JES-i birinshi modýliniń qurylysyn bastaýdy qamtamasyz etý maqsatynda engizilip otyr. Kelisimde qoldanylatyn termınderdi elektr energetıkasy, tabıǵı monopolııalar men retteletin naryq sýbektileriniń ınvestıtsııalyq qyzmeti máseleleri boıynsha sáıkestendirý úshin de ózgerister engiziletini belgili boldy», - delingen maqalada.
***
«Qazaqstannyń munaı óndire bastaǵan 114 jyldyq tarıhynda qurlyq betindegi, ıaǵnı jerústi munaı óndirisine basymdyq berilip kelgeni anyq. Búginde munaıdy teńizde óndirýge alǵash ret den qoıylyp otyr. Bul - jaqynda iske qosylǵan Qashaǵan jobasy jaıly áńgime. Osydan eki aı buryn Munaı jáne gaz mınıstrliginiń tizginin óz qolyna alǵan Uzaqbaı Qarabalın OKQ-da alǵashqy brıfıngin ótkizip, Astanany gazben qamtamasyz etý, Qashaǵan ken ornynyń ekonomıkalyq mańyzy, jergilikti halyqty jumyspen qamtý, ekologııalyq talaptardyń saqtalýy, t.b. máselelerge basa toqtaldy», - dep jazady «Aıqyn» gazeti. Basylymnyń alǵa tartqan derekterine qaraǵanda, 2014 jyly Qashaǵanda 8 mln tonna munaı óndiriledi dep kútilip otyr. Jalpy, aǵymdaǵy jyldyń 8 aıynda munaı óndirý jáne kondensat kólemi 54 mln tonnany quraǵan, bul byltyrǵy jyldyń tıisti deńgeıinen 3 paıyzǵa artyq. Al tabıǵı jáne ilespeli gaz óndirý 27 mlrd tekshe metrden asyp, bul byltyrǵy jyldyń kórsetkishinen 3,3 paıyz joǵary deńgeıdi kórsetken. Jalpy, 2013 jyly shamamen 82 mln tonna kondensat pen munaı óndiriledi dep josparlanǵan. Maqala «Qashaǵan ken ornynyń el ekonomıkasyna áseri zor bolmaq» degen taqyryppen berilgen.
«Nur Otan» halyqtyq-demokratııalyq partııasynyń músheleri arasynda jemqorlar qatary qalyńdap ketipti. Olardyń sany byltyrǵydan tórt esege (!) ósken. «Aıqyn» gazetiniń jazýynsha, muny basqa emes, «Nur Otan» partııasynyń saıası keńes bıýrosynyń keshegi otyrysynda partııalyq baqylaý komıtetiniń tóraǵasy Boran Raqymbekov málimdepti. Osy otyrysta kezinde partııanyń arqasynda Parlament qabyrǵasynan bir-aq shyqqan eks-depýtat Baqyt Syzdyqovanyń da jemqorlyqqa qatysty aıyptalyp otyrǵany áshkere boldy. «Keshe bizge kóztanys eki sheneýnik partııadan shyqsa, basqalary partııa qataryna qabyldandy. Máselen, Ádilet mınıstri Berik Imashev pen Bilim jáne ǵylym mınıstri Aslan Sárinjipov «Nur Otan» partııasynyń múshesi atandy», - dep jazady basylym beısenbilik sanyndaǵy «Syzdyqova saptan ketti» degen taqyryptaǵy maqalasynda.