Qazaqstan BUU Qaýipsizdik Keńesiniń 1000-nan astam otyrysyna qatysty
«Qazaqstannyń memlekettik organdarymen birlesip úlken praktıkalyq jumys atqaryldy. Qazaqstan delegatsııasy kún saıyn Keńestiń negizgi jalpy saıası is-sharalaryna da, sonymen birge jıyrma eki qosalqy organnyń: on bes komıteti, alty jumys jáne bir úılestirý tobynyń otyrystaryna qatysty. Eki jyl ishinde biz Qaýipsizdik Keńesiniń myńnan astam ashyq jáne jabyq otyrysyna, múshelerdiń qyryqqa jýyq resmı emes kezdesýine, Keńestiń jıyrmadan astam kóshpeli is-sharasyna qatystyq. Keńes Tóraǵasynyń júz on bes qararyn jáne qyryq segiz málimdemesiniń qabyldanýyna úles qostyq, jıyrma eki ret Keńes qujattarynyń teń avtory boldyq», - dedi Beıbit Atamqulov.
Óz kezeginde Parlament Májilisiniń depýtaty Saýytbek Abdrahmanov BUU Qaýipsizdik Keńesiniń qurylymdarynda Qazaqstan mıssııasy kúndelikti mańyzdy talqylaýlarǵa qatysyp otyrǵandyǵyn atap ótti.
«Qandaı aýqymdy jumys júrgizilgenin kórip otyrmyz. Elimizdiń ishki jáne syrtqy saıasattaǵy ornyqtylyǵynyń, Elbasynyń búkil álemdegi bedeliniń arqasynda qol jetken bul bıigimiz - bizdiń halyqaralyq arenadaǵy barsha bastamalarymyzdy BUU-nyń beıbitshilikti ornyqtyrý jónindegi qyzmetimen utymdy úılestirýge qajetti jaǵdaı jasaýǵa múmkindik berdi. Syrtqy saıasattaǵy tájirıbemizdi baıytty», - dedi S. Abdrahmanov.
Budan buryn habarlanǵandaı, búgin Májilistegi Úkimet saǵatynda «Birikken Ulttar Uıymy Qaýipsizdik Keńesindegi Qazaqstan Respýblıkasynyń 2017-2018 jyldardaǵy qyzmetiniń negizgi qorytyndylary aıtyldy.
QR Syrtqy ister mınıstri Beıbit Atamqulov Qazaqstan BUU aıasynda óz mıssııasyn abyroımen oryndaǵanyn málim etti.