Qazaqstan BUU Qaýipsizdik Keńesindegi jaýapkershilikke tyńǵylyqty daıyndalýda - Erlan Ydyrysov

ASTANA. QazAqparat - Aldaǵy ýaqytta Qazaqstan Táýelsizdiginiń 25 jyldyǵy aıasynda birqatar mańyzdy oqıǵalar ótkiziledi. Bul týraly búgin Astanada QR Syrtqy ister mınıstri Erlan Ydyrysov elimizdegi shetel dılomatııalyq korpýsy ókilderimen bolǵan kezdesýde aıtty.

«Jazǵy demalystan keıin kirisip otyrǵan qyzmetterińizde bizdiń kóp jaqty ári jemisti qatynastarymyzdy damyta túsesizder dep senemiz. Biz dástúrimizdi saqtap, sizdermen turaqty túrde kezdesý ótkizgimiz keledi. Aldaǵy ýaqytta mańyzdy oqıǵalar kóp bolady degen úmittemiz. Eń basty oqıǵamyz Qazaqstan Táýelsizdiginiń 25 jyldyǵy, osy rette jyl boıy elimiz úshin tarıhı mańyzy bar datany atap ótýge arnalǵan», - dedi mınıstrlik basshysy.

Osy rette  ol bıylǵa josparlanǵan eleýli sharalarǵa elimizde tirkelgen shetel dıplomattary mindetti túrde shaqyrylatynyn atap ótti

«2017-2018 jyldary BUU Qaýipsizdik Keńesiniń turaqty emes músheligine Qazaqstannyń saılanýyna óte qýanyshtymyz. Bul turǵyda sizderdiń qoldaýlaryńyzǵa, yntymaqtastyq jumystaryńyzǵa úlken alǵysymyzdy aıtamyz», - dedi mınıstr elimizdegi shetel dıplomatııalyq korpýsy ókilderine qaratyp aıtqan sózinde.

E. Ydyrysovtyń sózine qaraǵanda, Qazaqstan BUU Qaýipsizdik Keńesinde ózine jaýapkershilikti alýǵa baıyppen daıyndalýdy. Osy oraıda múshelik boıynsha keshendi jospar ázirlenip jatyr.

«Biz BUU Qaýipsizdik Keńesindegi músheligimizdi beıbitshilikti nyǵaıtý aıasyndaǵy bastamalardy alǵa jyljytýda seriktestermen tyǵyz qarym-qatynasta jumys isteý úshin paıdalanamyz.  Prezıdent N. Nazarbaev «Álem. 21 ǵasyr» manıfesi baǵytynda úlken jumys atqardy. Barlyq bastamalar álem jurtshylyǵyna naqty ári túsinikti túrde jetkizildi», - dedi mınıstr.