Qazaqstan BUU Qaýipsizdik Keńesinde saqtandyrý dıplomatııasyn damytýǵa úles qosýǵa tyrysady - Sátpaev
Mundaı pikirdi QazAqparat tilshisine suhbat bergen tanymal saıasattanýshy Dosym Sátpaev bildirdi.
«Qazaqstannyń BUU Qaýipsizdik Keńesiniń turaqty emes músheligi laýazymyndaǵy basty mindetteriniń biri - bul saqtandyrý dıplomatııasy ıdeıasyn, janjaldy jaıttardy retteý ıdeıasyn ilgeriletý, sonymen qatar ekstremızm jáne terrorızmmen kúreske jumyldyrýǵa basa mán berý bolýy tıis. Árıne, Qazaqstan Qaýipsizdik Keńesiniń turaqty emes múshesi bola otyryp, ıadrolyq qarýdy taratpaýǵa, álemniń túrli óńirlerinde jańa ıadrosyz aımaq qurýǵa qatysty óziniń buǵan deıingi bastamalaryn kóteretin bolady. Onyń ústine sońǵy birneshe jyl boıy Qazaqstan basshylyǵy bul salada birqatar mańyzdy bastamany usynǵan da edi. Sondyqtan eń aldymen Qazaqstan osynaý halyqaralyq alańdy jahandyq jáne óńirlik qaýipsizdikke qatysy bar halyqaralyq konferentsııalarda, túrli is-sharalarda usynylǵan óziniń barlyq bastamalaryn belsendi ilgeriletedi», - dedi Sátpaev.
Sonymen qatar saıasattanýshy Qazaqstannyń ózge de taqyryptar boıynsha jumys toptary men komıssııalardyń otyrystaryna da qatysatyndyǵyn atap ótti. Máselen, qazirdiń ózinde Qazaqstannyń birneshe ondaǵan jyldan beri túrli janjal oshaǵyna aınalǵan Afrıkanyń birqatar elderindegi, Taıaý Shyǵystaǵy jaǵdaımen baılanysty sarapshylar tobynyń otyrysyna qatysatyndyǵy belgili. Munan bólek, Sırııa problemasyna qatysty máselelerdi talqylaýǵa da atsalysady. Óıtkeni, Qazaqstan Sırııa janjalyn retteý boıynsha kelissózderdi osy jyldyń qańtarynda ótkizýge alań usyný arqyly janama bolsa da aralasýda.
Tolyqtaı alǵanda, Dosym Sátpaevtyń paıymynsha, Qazaqstan óz bastamalaryn ilgeriletýmen qatar álemniń basqa da óńirlerindegi ózge de geosaıası oıynshylar belsendi áreket etip jatqan janjaldardy retteýge qatysty pikirsaıystarǵa aralasady. Al bul bizdiń elimizdiń halyqaralyq mártbesin arttyrýǵa óz septigin tıgizeri anyq.