Qazaqstan BUU elektrondy úkimet boıynsha álemdik reıtınginde 24-orynǵa ıe boldy

<p>ASTANA. KAZINFORM &ndash; Qazaqstan tsıfrlyq basqarý salasynda jahandyq arenadaǵy pozıtsııalaryn nyǵaıtýda. 2024 jylǵy UN E-Government Survey esebine sáıkes, el elektrondy úkimetti damytý boıynsha álemdik reıtıngte 24-orynǵa kóterilip, ótken eseppen salystyrǵanda óz pozıtsııasyn 4 satyǵa jaqsartty. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstrligi málim etti.</p>

Bul Qazaqstannyń BUU reıtıngine qatysý tarıhyndaǵy eń úzdik kórsetkishterdiń biri.

Reıtıngte BUU sarapshylary elektrondy qyzmetterdiń damýyn, adam kapıtalyn jáne telekommýnıkatsııalyq ınfraqurylymdy baǵalaıdy.

«Bul bizdiń tsıfrlandyrýdaǵy jáne tıimdi memlekettik basqarýǵa qol jetkizýdegi jetistikterimizdi kórsetetin mańyzdy kórsetkish. BUU reıtıngi eki jylda bir ret jasalady jáne ol 193 eldi baǵalap, elektrondy qyzmetterdiń damýy, adam kapıtaly men telekommýnıkatsııalyq ınfraqurylym sııaqty negizgi aspektilerdi eskeredi. Bul jetistik — birlesken jumystyń nátıjesi, jáne biz óz qyzmetterimizdi árbir qazaqstandyq úshin qoljetimdi, qaýipsiz jáne ınnovatsııalyq etý úshin jumysty jalǵastyra beremiz!», - dep atap ótti QR tsıfrlyq damý mınıstri Jaslan Mádıev.

Esepte negizgi kórsetkishter de atap ótilgen:

Qazaqstan óte joǵary EGDI kórsetkishi bar elder tobyna kiredi. Qazaqstan 24-oryndy ıelenip, Izraılden keıingi oryndy alady jáne elektrondy úkimetti damytý ındeksi (EGDI) óte joǵary elder qataryna kiredi. Aǵymdaǵy jyldyń reıtınginde Qazaqstannan keıingi oryndarda: Ýrýgvaı (25 oryn), Shveıtsarııa (26 oryn), Túrkııa (27 oryn), Frantsııa (34 oryn), Qytaı (35 oryn), Kanada (47 oryn) ornalasqan. 2024 jylǵy reıtıng 2022-2023 jyldary jınalǵan derekterge negizdelip, BUU-nyń 193 múshe memleketin baǵalaıdy.

Onlaın-qyzmetter boıynsha TOP-10. Qazaqstan onlaın-qyzmetter ındeksi (OSI) boıynsha 10-orynǵa ıe bolyp, álemdik reıtıng kóshbasshylary – Ońtústik Koreıa, Danııa jáne Estonııamen qatar tur. Sondaı-aq Qytaı, Germanııa jáne Avstralııa sııaqty elderden ozyp, osy saladaǵy aldyńǵy qatarly elder qataryna kirdi.

TMD elderi arasynda kóshbasshy. Qazaqstan TMD elderi arasynda kóshbasshylyǵyn jalǵastyryp, Reseı Federatsııasynan (43-oryn), Armenııadan (48-oryn), Ózbekstannan (63-oryn) jáne Ázerbaıjannan (74-oryn) ozyp tur.

Teńizge shyǵa almaıtyn elder arasyndaǵy joǵary jetistikter (LLDC). Qazaqstan teńizge shyǵa almaıtyn elder arasynda 0.9009 EGDI ındeksimen 1-orynǵa ıe. Odan keıin Mońǵolııa, Armenııa jáne Ózbekstan keledi.

Telekommýnıkatsııalyq ınfraqurylymdy damytý. Qazaqstan telekommýnıkatsııalyq ınfraqurylym ındeksi (TII) boıynsha óz pozıtsııasyn 23 orynǵa jaqsartyp, 41-oryndy ıelendi.

Esepte sondaı-aq, Qazaqstan tsıfrlyq ınfraqurylymǵa belsendi túrde ınvestıtsııa salyp, jasandy ıntellekt, blokcheın jáne zattar ınterneti (IoT) sııaqty ozyq tehnologııalardy engizý arqyly tsıfrlyq transformatsııa salasynda aıtarlyqtaı ilgerileýge qol jetkizgeni atap ótilgen. Bul bastamalar basqarýdy jáne memlekettik qyzmet kórsetýdi túbegeıli ózgertti, olardy qoljetimdi ári ashyq etti.

Ulttyq IKT jáne tsıfrlyq saýattylyqty damytý strategııasy, sondaı-aq memlekettik qyzmetterdiń sapasyn jaqsartýǵa basa nazar aýdarý eldiń álemdik reıtıngterde odan ári ósýine jáne ony álemdegi tsıfrlyq transformatsııa kóshbasshylarynyń biri retinde nyǵaıtýǵa yqpal etýde.