Qazaqstan ókili BUU Bas Assambleıasynyń 79-sessııasynyń Jalpy saıası debattarynda sóz sóıledi

<p>ASTANA. KAZINFORM - Qazaqstan Respýblıkasy Premer-Mınıstriniń orynbasary &ndash; Syrtqy ister mınıstri Murat Nurtileý BUU Bas Assambleıasynyń 79-sessııasynyń Jalpy saıası debattarynda sóz sóıledi.</p>

QR Syrtqy ister mınıstrligi baspasóz qyzmetiniń habarlaýynsha, óz sózinde M.Nurtileý aǵymdaǵy otyrys jahandyq qaýipsizdik júıesi kúıreý aldynda turǵan synı sátte ótip jatqanyn atap ótti.

«Ondaǵan elder qaqtyǵystar men turaqsyzdyqqa ushyrap, myńdaǵan adamnyń ómirin qıdy, al búkil kontınentter klımattyq daǵdarystan zardap shegýde», – dedi ol.

QR SІM basshysy BUU Bas Assambleıasynyń aldyńǵy sessııasynda Qazaqstan Prezıdenti Qasym-Jomart Toqaev usynǵan «Beıbitshilik pen kelisim úshin álemdik birlik» bastamasyn iske asyrý qajettigin eske saldy. Ol jahandyq máselelerdi sheshýge orta derjavalardyń belsendi qatysýyna shaqyrdy: «Orta derjavalar men damýshy elderdiń daýystary kelispeýshilikterdi eńserý jáne turaqty halyqaralyq qaýipsizdik arhıtektýrasyn qurý úshin mańyzdy».

Klımattyq syn-qaterler týraly aıta otyryp, M.Nurtileý damyǵan elder men halyqaralyq qarjy ınstıtýttaryn Parıj kelisiminiń erejelerine sáıkes tabysy tómen jáne ortasha elderge jasyl tehnologııalar men jeńildikti qarjylandyrýdy usynýǵa járdemdesýge shaqyrdy.

Mınıstrdiń aıtýynsha, Qazaqstan 2026 jyly Óńirlik klımattyq sammıt ótkizýdi josparlap, óz úlesin qosýǵa nıetti.

SІM basshysy Memleket basshysy júrgizip jatqan Ádiletti Qazaqstandy qurý jónindegi reformalar sheńberinde elimizde ólim jazasy joıylǵanyn, balalar men áıelderge qatysty zorlyq-zombylyq úshin jaýapkershilik kúsheıtilgenin, azaptaýǵa múldem tózbeýshilik saıasaty júrgizilip jatqanyn jáne ulttyq aldyn alý tetikteri nyǵaıtylǵanyn atap ótti.

M.Nurtileý tsıfrlyq transformatsııanyń mańyzdylyǵyn jeke atap ótti: «2030 jylǵa deıingi tsıfrlyq kún tártibi tehnologııalarǵa teń qol jetimdilikti talap etedi. Jasandy ıntellekttiń damýy bizge kıberqaýipter men derekter qaýipsizdigine qaýip tóndiretin jańa qıyndyqtar týǵyzady».

Mınıstr etıkalyq standarttardy ázirleý úshin jasandy ıntellekt máseleleri jónindegi BUU Keńsesin qurý ýaqtyly sheshim ekenin atap ótip, BUU-nyń osy protsesterdegi rólin kúsheıtýdi usyndy.

Qorytyndylaı kele, Qazaqstan SІM basshysy Bolashaq sammıti men BUU Bas Assambleıasynyń aǵymdaǵy sessııasy barlyq urpaq úshin jarqyn, ınklıýzıvti jáne qaýipsiz bolashaqqa jol ashatyn mańyzdy qadamdar bolatynyna senim bildirdi: «Bul is-sharalar bizdiń ortaq bolashaǵymyz úshin ózgeristerge jol ashsyn».