Qazaqstan BUU Adam damýynyń ındeksi boıynsha Belarýs pen Reseıden keıin tur

ASTANA. QazAqparat - BUU-nyń Damý baǵdarlamasy 2016 jylǵa arnalǵan adam damýy jónindegi baıandamasyn jarııa etti. Onda Qazaqstannyń Adam damýynyń ındeksinde (ADI) 56-shy orynǵa turaqtaǵandyǵy aıtylady, dep habarlaıdy QazAqparat.

Qazaqstan adam damýy joǵary deńgeıdegi memleketterdiń qatarynda tur. Alaıda, EAEO boıynsha seriktester Belarýs (52 oryn) pen Reseıden (49) keıingi orynda. Bul memleketter adam damýy óte joǵary deńgeıdegi elderdiń qataryna ilikti. Armenııa bul tizimde 84 orynǵa turaqtady, al, Qyrǵyzstan 120-shy orynnan kórindi (adam damýy ortasha deńgeıdegi memleketter toby).

Baspasóz málimetterine qaraǵanda, Eýropa men TMD aımaqtary Adam damýy ındeksi boıynsha damýshy óńirlerdiń arasynda eń joǵary dárejede. Atalmysh aımaqtaǵy memleketter adam damýy jaǵynan osyǵan deıin azdap artta qalyp kelgendigine qaramastan keıingi ýaqytta aıtarlyqtaı jetistikterge qol jetkize bildi. 

Bul óńirlerde sonymen qatar damyp kele jatqan óńirlerge qaraǵanda teńquqylyq máselesi durys sheshimin tapqan. Munda adam damýynyń teńsizdik turǵysynan alǵandaǵy kórsetkishi Adam damýy ındeksinen nebári 13 paıyzǵa ǵana tómen.

Baıandamada óńirdegi árbir elde belgili bir adamdardyń toptary urpaq arasyndaǵy baılanystyń alshaqtyǵy, laıyqty ómir súrýge qol jetkize almaý sııaqty qıyndyqtarmen kezdesip jatatyny aıtylǵan.

Aıta keteıik, 2015 jyldyń baǵalaý málimetteri boıynsha daıyndalyp, 2017 jyldyń 21 naýryzynda jarııalanǵan Adamý damý ındeksi boıynsha memleketterdiń tizimi BUU-nyń Damý baǵdarlamasynyń Adamzat damýy týraly esebine engizilgen. Tizimge BUU-na múshe 193 memlekettiń 185-i, sonymen qatar Gonkong (Qytaıdyń arnaıy ákimshilik aýmaǵy) pen Palestına memleketi kirgen.