Qazaqstan Búkilálemdik etnosport oıyndaryn ótkizýge ótinim berdi

ASTANA. QazAqparat - Astanada QR Mádenıet jáne sport mınıstri Arystanbek Muhamedıuly, QR Ulttyq sport túrleri qaýymdastyǵynyń tóraǵasy Qaırat Satybaldy jáne ıÝNESKO-nyń Dástúrli sporttar men oıyndar komıtetiniń tóraǵasy Halıl Ahmed Han ózara nıettestik hatyna qol qoıdy, dep habarlaıdy QazAqparat tilshisi.

Uıymdastyrýshylardyń aıtýynsha, bul úshjaqty kelisimniń maqsaty - Qazaqstandaǵy ulttyq sportty damytýda birge jumys isteý jáne 2021 jyly Qazaqstan Táýelsizdiginiń 30 jyldyǵyna oraı tuńǵysh ret Búkilálemdik etnosport oıyndaryn uıymdastyrýǵa nıettestik bildirý.

Eske sala ketsek, 2021 jyly ıÝNESKO aıasynda alǵash ret álemdik etnosport oıyndaryn ótkizý josparlanyp otyr. Bul básekeni uıymdastyrýǵa laıyqty tórt memlekettiń qatarynda Qazaqstan da bar.

«Dástúrli sporttyq jarystar - tarıhı muranyń ajyramas bólshegi. Qazaqstan ulttyq sport túrlerine aıryqsha kóńil bólip otyr. ıÝNESKO aıasynda tuńǵysh ret ótetin Ulttyq sport túrleri Olımpıadasynda qazaqstandyq taraptyń úlken yntasy men halyq dástúrine qurmetpen qaraımyz. Meniń oıymsha, bul oıyndardy ótkizýde Qazaqstannyń múmkindigi mol. Bir kezderi Grekııa tuńǵysh Olımpıadanyń otanyna aınalyp, tarıhta qalyp edi. Qazaqstan da ıÝNESKO oıyndaryn alǵash ret ótkizgen memleket bola alady. Bul ıÝNESKO-ǵa uıymnyń basty maqsatyn - halyqtar mádenıetin saqtaý jáne damytýdy júzege asyrýǵa múmkindik beredi», - deıdi Halıl Ahmed Han.

Aıta keteıik, 1-2 maýsym kúnderi Astana qalasynyń 20 jyldyǵyn merekeleý aıasynda teńge ilýden II, aýdaryspaqtan III Azııa chempıonaty ótedi. Ondaǵy jalpy júlde qory - 14 mln teńge.

Atalǵan sporttyq sharalarǵa ıÝNESKO-nyń Dástúrli sporttar men oıyndar komıteti ókilderi qatysady.