Qazaqstan búkil oıynshylarmen áriptestikke daıyn – Memleket basshysy

ASTANA. QazAqparat – QR Prezıdenti Qasym-Jomart Toqaev Birikken Ulttar Uıymy Bas Assambleıasy 77-sessııasynyń jalpy debatynda sóılegen sózinde álem elderin jahandyq qaýipsizdik qundylyqtaryn sheshimtal túrde qorǵaýǵa shaqyrdy, dep habarlaıdy QazAqparat tilshisi.

«Dástúrli jáne ıadrolyq qarýsyzdanýdyń jahandyq júıesi álsiregen kezde atalǵan úsh qaǵıdatqa qaýip tónedi. Kerisinshe, úsh qaǵıdattyń túgel saqtalýy olardyń kúsheıýine yqpal etedi. Bul qaǵıdattar birge keńeıtilgen memleketaralyq yntymaqtastyqtyń kelesi úsh deńgeıine negiz bolady: sýbóńirlik, óńirlik jáne jahandyq. Bul adamzat úshin paıdaly.

BUU aıasynda bekitilgen qundylyqtar júıesi álemniń túkpir-túkpirindegi mıllıondaǵan adamǵa úmit sáýlesi bolyp qala beredi», - dedi Qasym-Jomart Toqaev.

Prezıdent osy úmitti aqtaý jolynda Qazaqstannyń barsha taraptarmen áriptestikke daıyn ekenin atap ótti.

«Biz yntymaqtastyq rýhyna negizdelgen BUU-ny basshylyqqa alyp, atalǵan qundylyqtardy batyl qorǵaýǵa tıispiz.

Basqasha aıtqanda, biz qol qýsyryp, álemniń polıarlanýyna jáne bólshektenýine kóne almaımyz. Biz ortaq muramyz ben ıgiligimizge nuqsan keltiretin batylsyzdyqqa nemese birjaqty múddege jol berýge quqymyz joq.

Kóp nársege táýekel etýge týra keledi. Osyǵan baılanysty Qazaqstan ınklıýzıvtilik, kópjaqtylyq jáne izgi nıet jolynda tıisti sýbektilerdiń bárimen yntymaqtastyq ornatýǵa daıyn», - dedi Memleket basshysy.