Qazaqstan birqatar elmen ınvestıtsııalardy ózara qorǵaý týraly kelisim jasamaq

<p>ASTANA. KAZINFORM &ndash; Qazaqstan birqatar elmen ınvestıtsııalardy ózara qorǵaý týraly kelisim jasaýǵa nıetti. Bul týraly Májilistiń Halyqaralyq ister, qorǵanys jáne qaýipsizdik komıtetiniń otyrysynda Syrtqy ister mınıstriniń orynbasary Nazıra Nurbaeva aıtty.</p>

«Saıası deńgeıde ınvestıtsııalardy kótermeleý jáne ózara qorǵaý týraly kelisimder jasasý arqyly negizgi ınvestor eldermen ózara tıimdi qatynastar qurý boıynsha jumys júrgizilip jatyr. Búgingi tańda Túrkııa, Saýd Arabııasy, Qytaı, Indonezııa, Qatar jáne Túrikmenstan kontragentterimen kelisim mátinin talqylaý boıynsha kelissózderdiń shamamen 30 raýndy júrgizildi», - dedi Nazıra Nurbaeva. 

Sondaı-aq Italııa, AQSh, Qytaı, Kanada, Úndistan jáne Indonezııamen kelisimderge qol qoıý jumystary belsendi júrgizilip jatyr. 

«Memleket basshysynyń sheshimi boıynsha ınvestıtsııalardy tartý jónindegi keńestiń qyzmeti tolyǵymen qaıta formattaldy. Onyń negizgi mindetteriniń biri - ortalyq jáne jergilikti memlekettik organdar men kvazımemlekettik sektor sýbektilerin tarta otyryp, ınvestıtsııalyq jobalardyń problemalyq máselelerin sheshý», - dedi mınıstr orynbasary. 

Jańa formattaǵy shtabtyń 11 otyrysy ótkizildi. Olardyń barysynda otandyq jáne sheteldik ınvestorlardyń birqatar naqty jaǵdaılary qaraldy. Onda problemalyq máseleler, sondaı-aq bıýrokratııalyq kedergiler anyqtalyp, ortalyq memlekettik organdarǵa, ákimdikterge jáne ulttyq kompanııalarǵa olardyń shuǵyl sheshimi boıynsha 130 tapsyrma berildi.