Qazaqstan Brazılııanyń taý-ken óndirý salasyna ınvestıtsııa salady
"Qazaqstan Elshisi Qaırat Sarjanov Brazılııanyń Baııa shtaty ákimshiligi men «Bahia Mineração» kompanııasy arasynda Ileýs (Baııa shtaty) mýnıtsıpalıtetindegi Arıtagýa aýdanynda «Porto Sul» teńiz porty qurylysynyń jobasyn júzege asyrý jáne onyń eki jekemenshik termınalyn biriktirý maqsatynda arnaıy maqsattaǵy operator-kompanııa qurý týraly kelisimge qol qoıý rásimine qatysty", - delingen taratylǵan aqparatta.
Elshilik málimetinshe, Qaırat Sarjanov Salvador qalasyna sapary barysynda shtat gýbernatory Rýem Kostamen, Baııa shtaty Ónerkásip kásiporyndary federatsııasynyń prezıdenti Rıkardo Albanmen, atalǵan federatsııanyń syrtqy saýda jónindegi keńesiniń prezıdenti Andjelo Jýnıormen kezdesip, Brazılııanyń Baııa shtaty men Qazaqstan arasyndaǵy saýda-ekonomıkalyq jáne ınvestıtsııalyq yntymaqtastyq keleshegin talqylady.
Aıta keteıik, «Bahia Mineração» kompanııasy 40 paıyz úlesi Qazaqstan Úkimetine tıesili «Eurasian Resources Group» (ERG) tobynyń enshiles kásiporny sanalady. Atalǵan kompanııa Baııa shtatynyń Kaetıte mýnıtsıpalıtetindegi «Pedra de Ferro» temir keni óndiristik kesheninde joba júzege asyryp jatyr. ERG ınvestıtsııasynyń jalpy kólemi 1,5 mlrd dollardy quraıdy.