Qazaqstan boıynsha kommýnaldyq qyzmetke degen bereshektiń eń joǵary kórsetkishi Almatyda tirkelgen

ASTANA. 16 shilde. QazAqparat - Almatylyqtardyń kommýnaldyq qyzmet úshin debıtorlyq qaryzy elimiz boıynsha eń joǵary bolyp otyr.

Bul týraly búgin selektorlyq rejimdegi Úkimet otyrysynda QR Óńirlik damý vıtse-mınıstri Serik Nokın málim etti.

Belgili bolǵandaı, ótken jylý berý maýsymynyń sońynda kommýnaldyq qyzmetter úshin Qazaqstandaǵy tutynýshylardyń debıtorlyq qaryzy 6,5 mlrd. teńgeni qurady. Al bıylǵy 1 shildede bul qaryzdar 7,3 mlrd. teńgege jetti. ıAǵnı, ósim 698 mln. teńgeni nemese 11 paıyzdy qamtydy.

Vıtse-mınıstrdiń aıtýynsha, qaryzdyń ósimi negizinen Almaty qalasy men Ońtústik Qazaqstan oblysy esebinen bolyp otyr.

«Atap aıtqanda, Almaty, Astana jáne OQO boıynsha qaryzdyń kólemi 5,7 mlrd. teńgeni qurady, nemese bul óńirler jalpy respýblıka boıynsha debıtorlyq bereshektiń 75 paıyzyna jýyǵyn qamtýda. 1 shildedegi jaǵdaı boıynsha qaryzdyń eń joǵary kórsetkishi Almatyda - 4,2 mlrd. teńge kóleminde»,-dedi S. Nokın.

Atalǵan qaryzdardy tómendetý turǵysynda Aqmola, Almaty, Qyzylorda jáne Batys Qazaqstan oblystarynda birshama táýir kórsetkishterge qol jetkizilgen.