Qazaqstan boksyna qandaı ózgeris kerek - Ermahan Ybyraıymovtyń pikiri
«Ermahan myrza, bokstan ulttyq qurama basshylyǵyna kelsem, kóp nárse ózgerter edim depsiz. Eger basshylyqqa kelseńiz, ózgeristi neden bastaısyz?» degen suraq qoıyldy boksshyǵa Ortalyq kommýnıkatsııalar qyzmetinde.
«Men 2002-2004 jyly bas bapker qyzmetinde bolǵanmyn. Ol kezde Baqtııar Artaev Olımpıada chempıony boldy, Gennadıı Golovkın «kúmis», Serik Eleýov «qola» medal ıelengen edi. Úsh medal boldy. Ár Olımpıada oıynynda Qazaqstan boksshylary 3-4 medal alyp kele jatyr. Biraq, esterińizde bolsa 2008 jyly Qazaqstan qorjynyna eki-aq medal salyndy. Baqyt Sársekbaev pen Erkebulan Shynálıev «altyn» jáne «qola» júlde aldy. Kóptegen jankúıerlerimiz áleýmettik jelide kóptegen áńgime aıtyp jatyr. Sondyqtan, barlyq jankúıerlerdi sabyrǵa shaqyramyn. Qalǵan tórt boksshymyzdyń bári medal ákelse, bul áńgimeniń bári artta qalar edi. Sondyqtan, tórt boksshymyzǵa senim mol», - dedi E. Ybyraıymov.
Sonymen birge, spıker Qazaqstan boksyna taktıkalyq turǵyda ózgerister engizý kerektigin aıtty.
«Bizdiń boksshylar aldyńǵy qolmen múldem jumys istemeıdi. Tek kúshtirek qolyna senedi, oń bolsa oń qolmen, solaqaı bolsa – sol qolymen qatty soqqy jasaıdy. Biraq qashyqty saqtamaıdy. Londondaǵy Serik Sápıevteı, Afınadaǵy Baqtııar Artaevtaı jaqsy oıyn kórsete almaı jatyr. Sondyqtan bul jerde taktıkalyq turǵydan búkil boksshyǵa ózgeris kerek. Aıaqpen qorǵanys jasaý degen uǵym bar. Muhamed Álı aıtqandaı, kóbelek tárizdi ushyp-qonyp, ara sııaqty shaǵý kerek. Sondaı boksshyny qazir kórmeı otyrmyn. Áli de jigitterge aıtarym, aıaqpen jumys isteńizder, qashyqty saqtap, qaıtadan jetip baryp, qorǵanys jasaý kerek. Sondaı ózgerister engizer edim», - dedi Ermahan Ybyraıymov.
Buǵan deıin Ermahan Ybyraıymov Tokıo Olımpıadasyn jeńilgen boksshylarymyzdyń oıynyna taldaý jasaǵan edi.