Qazaqstan boks federatsııasynyń jańa basshysy ulttyq quramamen kezdesti

<p>ASTANA. KAZINFORM &ndash; Qazaqstan boks federatsııasynyń jańadan saılanǵan prezıdenti Shahmurat Mútálip ulttyq quramanyń bylǵary qolǵap sheberlerimen kezdesti.Bul týraly boks sarapshysy Jalǵas Túkeshov <a href="https://www.instagram.com/p/C3CDNlsog5f/" target="_blank" rel="noopener">Instagram</a>-daǵy resmı paraqshasyna jazdy.</p>

Kezdesý barysynda Bokstan ulttyq quramanyń bas bapkeri Myrzaǵalı Aıtjanov jańa basshyǵa Italııada ótetin reıtıngtik týrnırge baratyn sportshylardy tanystyrdy. Keıin Shahmurat Mútálip sportshylarǵa sáttilik tilep, jumyla eńbek etýge shaqyrdy.

«Maǵan daýys berip, qoldap osy federatsııanyń basshysy etip taǵaıyndap otyr. Bárińiz bilesizder aldymyzda óte úlken mindet tur. Boks bizdiń ulttyq sportymyz ǵoı. Búkil halyq jáne prezıdentimiz bizge úmit artyp otyr. Eń bastysy, kele jatqan Olımpıadaǵa daıyndyǵymyzdy shyńdaýymyz kerek. Osy oraıda jeke ózderińizben tanysyp, daıyndyqtaryńyzdy, jaǵdaılaryńyzdy kóreıin dep kelgen jaıym bar. Biz barlyq qoldan keletin jumysty, jaǵdaıdy jasaýǵa daıynbyz. Árıne aqyrǵy nátıjeni ózderińizden kútemiz. Biraq maqsatymyzǵa jetý úshin qandaı da bir jaǵdaılar bolsa, suraqtar bolsa, sonyń bárin oryndap, barlyq jaǵdaıdy jasaýda aıanyp qalmaımyz», – dedi federatsııa basshysy.

Sondaı-aq Shahmurat Mútálip boks federatsııasynyń burynǵy basshysy týraly sóz qozǵady.

«Keńes Hamıtulynyń da bizdiń boksqa sińirgen eńbegi óte kóp. Ol kisi alysqa ketken joq. Boks federatsııasynyń qurmetti prezıdenti bolyp qaldy», – dedi Shahmurat Mútálip.

Esterińizge sala keteıik, osyǵan deıin Italııada ótetin lıtsenzııadyq týrnırge bas bapker Myrzaǵalı Aıtjanov kimderdi alyp baratynyn jazǵan bolatynbyz