Qazaqstan boks federatsııasyna jańa basshy saılandy

<p>ASTANA. KAZINFORM - Búgin Astanada Qazaqstan boks federatsııasynyń jyldyq dástúrli jıyny ótti. Jıyn barysynda Federatsııanyń jańa prezıdenti bolyp Shahmurat Mútálip saılandy. Ol bul qyzmette Keńes Raqyshevti almastyrdy, dep habarlaıdy federatsııanyń baspasóz qyzmeti.</p>

Konferentsııanyń kezekti otyrysynda ótken jyl qorytyndylanyp, erler jáne áıelder komandasy bas bapkerleriniń esebi tyńdaldy. QBF jańa basshysynyń saılaý otyrystyń sońǵy bóliginde ótti.

Jańa qyzmetinde alǵash ret sóz alǵan prezıdent QBF aldyndaǵy mindetterdi birlesip oryndaýdyń mańyzdylyǵyn atap ótti. Sondaı-aq, ol ózine senim artqan Qaýymdastyq múshelerine alǵys bildirip, ortaq maqsatqa jetý jolynda óziniń bar kúshin salatynyn aıtty.

«Maǵan júktelgen jaýapkershilikti sezine otyryp, Qazaqstan boksyn ári qaraı damytýǵa, sportshylarymyzǵa jan-jaqty qoldaý kórsetip, olardyń múddesin qorǵaýǵa, QBF rolin el ishinde jáne halyqaralyq deńgeıde arttyrýǵa bar kúshimdi salamyn. Bıyl ótetin mańyzdy dodalar qarsańynda komandanyń aldynda úlken bir maqsat tur. Óz tarapymyzdan daıyndyqqa qajetti barlyq jaǵdaıdy jasaýdy jalǵastyra beremiz. Birlese eńbek etý arqyly otandyq bokstyń álemdik arenadaǵy bedelin nyǵaıta túsemiz», - dedi QBF jańa basshysy.

Shahmurat Mútálip 1990 jyly 18 qyrkúıekte Almaty oblysyndaǵy Kaztsık aýylynda týǵan. Ekonomıka ǵylymdarynyń magıstri, Kýala-Lýmpýrdegi The Asia Pacific University of Technology & Innovation (APU) oqý ornynda bilim alǵan. Kásipker, «Integra Construction KZ» JShS-nyń benefıtsıar ıesi.