Qazaqstan bitimgerlik rotasyn Lıvanǵa qazan aıynda jiberedi

ASTANA. QazAqparat - Qazaqstan Úndistanmen birge Lıvanda óz kontıngentin ornalastyrý jáne BUU qazaqstandyq «KAZTsENT» bitimgerlik oqý-jattyǵý ortalyǵyn sertıfıkattaýy arqyly BUU-nyń bitimgershilik operatsııalaryna óz úlesin arttyrýǵa nıetti. Bul týraly Qazaqstan Respýblıkasynyń Birikken Ulttar Uıymy janyndaǵy Turaqty ókili Qaırat Omarov BUU Qaýipsizdik Keńesiniń BUU-nyń bitimgerlik qyzmetin reformalaý jónindegi otyrysynda málimdedi.

QR SІM baspasóz qyzmetiniń mádlimetinshe, otyrys barysynda Qazaqstan Elshisi sapaly ózgeristerdi, BUU-nyń bitimgerlik júıesin baǵalaýdyń ınnovatsııalyq tásilderi men jańa krıterıılerin qoldaný qajettiligin atap ótken. Ol bitimgerlik qyzmet tıimdiligin arttyrýdyń negizgi sharttarynyń biri retinde BUU-nyń barlyq qurylymdarynyń úılestigin nyǵaıtý jáne esep berýdi qamtamasyz etýge nazar aýdardy.

«BUU-nyń bitimgerlik qyzmeti protsesine jańa elderdiń belsendi jumyldyrylýy jáne qatysýy, sonyń ishinde óz quramyn ornalastyrý arqyly BUU-nyń beıbitshilikti qoldaý jónindegi operatsııalaryna jańa energııa jáne tıimdilik beretinine senemiz», - dedi Q. Omarov.

Onyń aıtýynsha, bul úderis BUU mıssııalarynyń bedeli men tıimdiligin sondaı-aq elderdiń, óńirlik uıymdardyń jáne búkil álemdik qaýymdastyqtyń yntymaqtastyǵy men ujymdyq jaýapkershiligin arttyrady.

Sonymen qatar, Qazaqstandyq delegatsııa basshysy qaqtyǵystardy boldyrmaý men olardy sheshýde óńirlik qurylymdar arasyndaǵy  yntymaqtastyqtyń mańyzdylyǵyn atap ótip, daýlardyń aldyn alý men olardyń túbegeıli sebepterin aldyn ala eskerý boıynsha Qazaqstan usynǵan úshjaqty strategııany eske saldy.

Strategııa halyqaralyq qaýymdastyqtyń turaqtandyrý sharalarynyń tıimdiligin arttyrý maqsatynda qaýipsizdik pen damýdyń ózara baılanysyn kúsheıtý, ózekti máselelerdi sheshýde strategııalyq óńirlik tásildi qoldaný jáne jergilikti qoldaýdyń tıimdiligin arttyrý men ashyqtyqty qamtamasyz etý maqsatynda BUU-nyń túrli qurylymdary men agenttikteriniń úılestirýin nyǵaıtý úshin áleýetti qurýǵa negizdelgen.

Qaýipsizdik Keńesiniń otyrysynda BUU Bas hatshysynyń Bitimgerlik operatsııalar jónindegi orynbasary Jan-Per Lakrýa sóz sóıledi. Ol ozyq áskerı áleýetke ıe elderdi BUU-nyń mıssııalaryna bitimgerlik kúshter men jabdyqtardy jiberýdi jáne logıstıkalyq qoldaýdy kórsetýdi jáne bitimgerlik daıyndyqty kúsheıtýge shaqyrdy.

Qazan aıynyń sońynda Qazaqstan Úndistannyń bitimgerlik kúshterimen birge BUU-nyń Lıvandaǵy ýaqytsha kúshterine 120 áskerı qyzmetshilerden quralǵan bitimgerlik rotany jiberedi.

BUU-nyń Lıvandaǵy ýaqytsha kúshi 1978 jyly naýryzda Lıvan úkimetine eldegi bılikti qalpyna keltirýge kómektesý jáne osy elden Izraıl áskerleriniń shyǵarylýyn rastaý úshin qurylǵan. Qazirgi ýaqytta BUU-nyń Lıvandaǵy bitimgerlik mıssııasynda 42 elden 10 myńnan astam áskerı qyzmetin óteýde.