Qazaqstan birqatar elde saýda ókildikterin ashady

NUR-SULTAN. QazAqparat – Bıylǵy jyldyń sońyna deıin eksportty damytý boıynsha saýda ókildikter jelisi keńeıtilmek. Bul týraly Úkimet úıinde ótken baspasóz máslıhatynda QR Saýda jáne ıntegratsııa mınıstri Baqyt Sultanov málim etti, dep habarlaıdy QazAqparat tilshisi.

«Qazaqstandyq ónimdi shetelge ilgeriletý jáne súıemeldeý úshin eksporttaýshylarǵa «bir tereze» qaǵıdatyn qoldanatyn «QazTrade» tartylatyn bolady. Ol eksporttaýshy men memlekettik organ arasynda agent rólin atqarady. Bizdiń saýda ókildikterimiz de shetelde «QazTrade retinde syrtqy keńseler bolyp ashylady», - dedi mınıstr.

Onyń sózine qaraǵanda, aǵymdaǵy jyldyń sońyna deıin saýda ókildikter jelisin keńeıtý josparlanǵan. Álemdik tájirıbede Saýda ókildikteri saýda qatynastaryn keńeıtýdiń negizgi jáne tıimdi quraldarynyń biri bolyp sanalady.

«Qosymsha keńseler Qytaıda, jańa ókildikter Túrkııada, Úndistanda, Iranda, Ózbekstanda, Aýǵanstanda, Polsha men Chehııada ashylýy josparlanyp otyr. Bul keńselerde qazaqstandyq taýarlardy shetel naryǵynda ilgeriletý úshin bizdiń bilikti «lobbıster» jumys isteıtin bolady. Óńirlik jáne shekara mańyndaǵy saýdany damytý kózdelgen. Áleýmettik kásiptik korporatsııa bazasynda óńirlik eksporttaýshy ortalyqtar qurý josparlanyp otyr, olardyń qyzmetin «QazTrade» úılestiretin bolady», - dedi Baqyt Sultanov.

Foto: kolesa.kz