Qazaqstan birinshi kezekte óziniń ulttyq múddesin qorǵaýǵa mindetti - QR Prezıdenti

NUR-SULTAN. QazAqparat - Qazaqstan birinshi kezekte óziniń ulttyq múddesin qorǵaýǵa mindetti. Bul týraly Memleket basshysy Qasym-Jomart Toqaev Respýblıkalyq «Ana tili» basylymyna bergen suhbatynda aıtty, dep habarlaıdy QazAqparat tilshisi.

«Shynynda da, álem ózgerdi. Myzǵymastaı kóringen jahandaný úrdisi pandemııanyń áserinen kidiristep qaldy. Memleketter ózin-ózi oqshaýlaýǵa, «árkim óz kúnin ózi kórsin» qaǵıdatyna basa mán bere bastady. Halyqaralyq qatynastarda ultshyldyqqa bet burý úrdisi artyp kele jatqany baıqalady. Men muny 2008 jyly erterek boljap aıttym. Biraq ol kezde meniń tujyrymymdy saıasatkerler men ǵalymdar qoldamady. Tipti koronavırýsqa qarsy vaktsına ázirleý isi de halyqaralyq yntymaqtastyqtan tys, «árkim ózi úshin» qaǵıdaty boıynsha júzege asyrylýda. Álemde ózge balamasy joq Birikken Ulttar Uıymy óziniń atyna zaty saı biregeı halyqaralyq uıym retinde pandemııa kezinde asa belsendilik tanyta qoımady», - dedi Memleket basshysy.

QR Prezıdenti iri derjavalar arasynda teketires kúsheıip, aımaqtardaǵy qaqtyǵystar shıelenise túskendigin basa aıtty.

«Bul – óńirlik memleket retindegi Qazaqstan úshin qolaısyz úrdis. Bizdiń ekonomıkamyz sanktsııalyq soǵystar men saıası teketiresterden shyǵynǵa ushyraýda. Elimiz óziniń beıbitsúıgishtigi men óńirlik qaýipsizdikke syndarly úles qosýǵa ázirligin turaqty túrde kórsetip keledi. Elbasymyz ıadrolyq qarýǵa qarsy qozǵalystyń kóshbasshysy ári jappaı qarýsyzdaný saıasatynyń naǵyz jaqtaýshysy retinde búkil álemge tanyldy. Táýelsizdik jyldary bul baǵytty nyǵaıtý úshin kóp jumys atqaryldy. Eń bastysy – memlekettik shekaramyzdyń beriktigi! Qazaqstannyń Reseımen, Qytaımen jáne Ortalyq Azııa memleketterimen aradaǵy shekarasynyń zańdy túrde rásimdelip, belgilenýiniń, shyn máninde, tarıhı da, saıası da máni zor. Shekara máselesinde qujatty túrde ekijaqty kelisimniń bolmaýy qandaı aýyr ári aýqymdy zardaptar men qaıshylyqtarǵa ákeletinin kózimiz kórip otyr. Alystan da, jaqynnan da mysaldar az emes», - dedi QR Prezıdenti.

Qasym-Jomart Kemeluly Qazaqstannyń halyqaralyq dıplomatııada beıbit álem týraly árdaıym ózindik túsinigi, ózine tán ereksheligi bolǵanyn basa aıtty.

«Tuńǵysh Prezıdentimiz N.Nazarbaev kópvektorly, teńgerimdi syrtqy saıasatta Reseımen strategııalyq seriktestikti, yntymaqtastyqty nyǵaıtýǵa jáne óńirlik ıntegratsııaǵa basa mán berdi. Bul – durys tańdaý boldy. Degenmen, álemdegi ahýal bir ornynda turmaıdy, alpaýyt memleketterdiń geosaıası maqsaty ózgerýde. Osyndaı jaǵdaıda Qazaqstan birinshi kezekte óziniń ulttyq múddesin qorǵaýǵa mindetti. Sondyqtan men Eýrazııalyq ekonomıkalyq odaqtyń bıylǵy 19 mamyrda ótken sammıtinde ıntegratsııany Qazaqstannyń egemendigine nuqsan kelmeıtin jaǵdaıda ǵana qoldaıtynymyzdy ashyq aıttym», - dedi QR Prezıdenti.