Qazaqstan Birikken Arab Ámirlikterine ýran jetkizbek

ASTANA. QazAqparat - Astanada «Qazatomónerkásip» UAK» AQ men Emirates Nuclear Energy Corporation (ENEC, BAÁ) kompanııasy arasyndaǵy ózara túsinistik jónindegi memorandýmǵa qol qoıyldy.

Bul týraly «Qazatomónerkásip» UAK» AQ Qoǵammen baılanys departamenti habarlaıdy.

Memorandýmnyń maqsaty - Qazaqstan men Arab Ámirlikteri arasyndaǵy beıbit atom jáne energııa óndirý salasyndaǵy ózara tıimdi yntymaqtastyqty qalyptastyrý.

Sondaı-aq, memorandýmda BAÁ-nyń atom stantsııalary úshin tabıǵı ýran jetkizý, otyn fabrıkatsııalaý boıynsha Qazatomónerkásiptiń óndiristik kásiporyndaryn paıdalaný, jańa ıadrolyq qondyrǵylar qurylysynda ózara qoldaý kórsetý, tájirıbe almasý sııaqty yntymaqtastyqtyń basqa da baǵyttaryndaǵy nıettestik kórinis tapqan.

Qujatqa Qazatomónerkásip tarapynan ulttyq atom kompanııasynyń Basqarma tóraǵasy Ǵalymjan Pirmatov, ENEC jaǵynan Aǵa atqarýshy dırektor Mohammed Al Hammadı qol qoıdy.

Aıta keteıik, ENEC - Birikken Arab Ámirlikteriniń atom energııasy jónindegi korporatsııasy. Korporatsııa 2009 jylǵy jeltoqsanda BAÁ atom energııasy sektoryn damytý, eldegi atom stantsııalarynyń qurylysyn jáne odan keıingi jumysyn baqylaý maqsatynda qurylǵan.

Al, «Qazatomónerkásip» UAK» AQ - Qazaqstannyń ýran jáne onyń qosyndylaryn, sırek metaldar, atom elektr stansalaryna arnalǵan ıadrolyq otyn, arnaıy qural-jabdyqtar, tehnologııalar jáne ekiudaı maqsattaǵy materıaldar eksportymen aınalysatyn ulttyq operator. Kompanııa qyzmetiniń basty baǵyttary - geologııalyq barlaý, ýran óndirisi, ıadrolyq otyn tsıkly ónimderin óndirý jáne konstrýktsııalyq materıaldar óndirisi. Búgingi tańda kompanııada 26 000-nan astam adam eńbek etedi. Qazatomónerkásip álemniń jetekshi ýran óndirýshi kompanııalarynyń kóshin bastap keledi.